సరసము దెలియని మగనిని సతి మెచ్చుకొనెన్!!!

పరిణయ పూర్వము తరుణిరొ,
పరిపరి విధముల కనుగొనె ప్రణయపు తీరుల్,
వరునకు లేవని,పరసతి

సరసము దెలియని మగనిని సతి మెచ్చుకొనెన్!

(శంకరాభరణం  బ్లాగు లో08-11 -2010 నాటి  సమస్యా పూరణ-145లో
ఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు. )

చుక్క నీరు లేని చక్కని నూయేల?

సోమరైన వాడు భీముడైనను యేల,
దాన గుణము లేని ధనికు డేల,
చుక్క నీరు లేని చక్కని నూయేల?
మంద వారి మాట మణుల మూట!

రాజ నీతి బుధుడు రాణిoచె ఆనాడు!!!

రాజ నీతి బుధుడు రాణిoచె ఆనాడు
రాజ కీయ మందు,రణము నందు ,
గెలిచి పేరు దెచ్చె లాలు బహద్దూరు .
పొట్టి వాడె కాని గట్టి వాడు !

వెన్నలలో తనువునుండి వెడలెను సెగలే!!!

వన్నెలవరూధిని గనియె,
ఎన్నడు ఎఱుగని ప్రవరుని ఎదురుగ,నాడా
పున్నమి చంద్రుని సాక్షిగ,
వెన్నలలో తనువునుండి వెడలెను సెగలే! 
(శంకరాభరణం  బ్లాగు లో02 -11 -2010 నాటి  సమస్యా పూరణ-141లో
ఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు. )

సిరివలదనువానికిలను చిక్కులె గాదా!

హరి కైనను, హరు కైనను
సురపతికైన,ధరనేలు శూరుని కైనన్,
నిరతము గావలె జీవన
సిరి,వలదనువానికిలను చిక్కులె గాదా!

ముండై యుండుట మేలుగాదె జగతిన్ ముత్తైదువుల్ మెచ్చగన్!!!.

గండంబుల్ పలు రానిపోని ,ధరలో గర్వాంధులన్ ద్రుంచ,భీ
ముండైయండగ నుండు వాడు,మదిలొ మ్రోగించ రాగంబు కృ
ష్ణుండై,తోడును వీడకుండ నెపుడున్ శోకంబు దీర్పంగ,రా
ముండై యుండుట మేలుగాదె జగతిన్ ముత్తైదువుల్ మెచ్చగన్!!!.

నైతిక విలువలను వీడి నాయకుడయ్యెన్ !!!

వైతాళికుడెవ్వడు,గన,
బేతాళుడె,నీతుల అతిభీతిగ గోతిన్
పాతర జేసిన ఘనుడే,
నైతిక విలువలను వీడి నాయకుడయ్యెన్ !
(శంకరాభరణం  బ్లాగు లో31-10 -2010 నాటి  సమస్యా పూరణ-139లో
ఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు. )

సరకుల ధర మింటి కెగిసె!!!

సరకుల ధర మింటి కెగిసె,
వరి పంటలు నీట గలిసె, వరదలు రాగా,
చిరు సాయము సరి పోదని
సిరి వలదను వాని కిలను చిక్కులు గాదా!!

ఖర పదముల మ్రొక్కి నపుడె కలుగును సుఖముల్!!!

హరి పదములు, రమకు వరము,
పురహరి పదములు, గిరిజకు పరమై పోయెన్,
పుర జనులకు సద్గుణ శే

ఖర పదముల మ్రొక్కి నపుడె కలుగును సుఖముల్!

(శంకరాభరణం  బ్లాగు లో30-10 -2010 నాటి  సమస్యా పూరణ-138లో
ఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు. )

బలరాముడు సీత జూసి ఫక్కున నవ్వెన్!!!

తుల నాడిన వాడిని గని,
తల నంటెను చెప్పు తోడ, తరుణిరొ ,భద్రా
చలమున నవమిన నేటి స
బల!రాముడు సీత జూసి ఫక్కున నవ్వెన్! 
(శంకరాభరణం  బ్లాగు లో 29 -10 -2010 నాటి  సమస్యా పూరణ-137 లో
ఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు. )

క్రీస్తు శిలువ నెక్కి కీర్తి శిఖరమెక్కె !!! క్రిస్టమస్ శుభా కాంక్షలు.!!!

క్రీస్తు శిలువ నెక్కి, కీర్తి శిఖరమెక్కె ! 
ప్రజలు గొలిచి రతని ప్రభువు జేసి !
పాపు లందు నతడు  పరమాత్మనే జూసె!!!
మంద వారి మాట !మణుల మూట !

క్రిస్టమస్ శుభా కాంక్షలు.

పుత్తడి ధగ ధగలు,ఇత్తడి కబ్బునా?

ఉత్తముండు పలుక చిత్తగించుట మేలు,
చెత్త మాట లేల చెవిని  నింప,
పుత్తడి ధగ ధగలు,ఇత్తడి కబ్బునా?
మంద వారి మాట!మణుల మూట!!

పచ్చి మాంసమ్ము దినువాడు,బ్రాహ్మణుండు!!!

పచ్చి మాంసమ్ము దినువాడు,బ్రాహ్మణుండు,
ప్రక్క ప్రక్కనే నిలబడి మ్రొక్కినారు,
పరమ నిష్టతో పరమేశు పార్వతులను,
భుక్తి కొరకునొకరు,మరి ముక్తికొకరు!

గురువు పరువు ఊరి మురుగులో గలిపిరి.!!!

చదువు చెప్పు బుధులు  సరసాల కొడగట్టి,
శిష్యు రాండ్ర నకట చెరచి రైరి
గురువు పరువు ఊరి  మురుగులో గలిపిరి.
మంద వారి మాట మణుల మూట!
(నేడు TV9 లో ప్రసారమైన వార్తలకు స్పందించి వ్రాసినది )

పగటి పూట చంద్రుని గనె పద్మ నయన!

గగన మంటిన సౌధమ్ము సిగన నున్న,
రవిని మరిపించు   నంబాని భవన కాంతి,
రేయి వెళ్ళినా రేరాజు రేఖ వోలె,
పగటి పూట చంద్రుని గనె పద్మ నయన!
(శ్రీ ముఖేష్ అంబాని గారి భవనాన్ని
మొన్ననే నెట్లో చూసాను చాల బావుంది)

పరిచయంబులు,ప్రణయంబు,పరిణయంబు,
వరుసక్రమమున జరిగె శ్రీవాణి,చంద్ర
ములకు,తొలిరేయి కోమలి కలలుపండ,
పగటిపూట చంద్రునిగనె పద్మనయన!
(శంకరాభరణం  బ్లాగు లో 27 -10 -2010 నాటి  సమస్యా పూరణ-135 లో
ఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు. )

బాధ నార్చువాడు భగవంతుడే గదా!

బాధ లెఱుగ లేరు బాధించు వారలు,
బాధితులకు  తెలియు బాధ తీరు,
బాధ నార్పు వాడు భగవంతుడే గదా!
మంద వారి మాట మణుల మూట!!!

నీతి విలువలు దిగజారె ! రీతి మారె!!! & వెన్నదొంగని బిలిచిరి చిన్నజేసి!!!

ధీరుల దరిన జేరిన ,తీరు టెట్లు
కలలు? కడుపు నిండదు,కాసు లేల రాలు?
నీతి విలువలు దిగజారె ! రీతి మారె!
జార చోరుల కీర్తించు వారె ఘనులు!

గిరిని కొనగోట నిలిపిన హరిని గనిరి,
ఉల్లముల నెత్తుకెళ్ళిన గొల్లడనిరి,
వెన్నదొంగని బిలిచిరి చిన్నజేసి,
జారచోరుల కీర్తించువారె ఘనులు! 

సంయ మీoద్రుడు గోరెను సంగమమును!

జ్ఞాన మూర్తుల, తత్వ విజ్ఞాన ధనుల,
నుర్వి జనులకు ,అధికార గర్వితులకు,
మంచి చెడులను, సూచించ నెంచి,తపసి ,
సంయ మీoద్రుడు గోరెను సంగమమును! 
(శంకరాభరణం  బ్లాగు లో25-10 -2010  నాటి సమస్యా పూరణ133 లో
ఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షింఛి ఆనందింప వచ్చును.) 

మనసు మలిన పడిన మార్గమ్ము చీకటౌ!

మనసు మలిన పడిన మార్గమ్ము చీకటౌ!
కళ్ళు గాన రావు ముళ్ళు గ్రుచ్చు,
మాధవుడిని  గొలువ మలినములెడమౌను !
మంద వారి మాట! మణుల మూట!

కవుల కొలను లోకి కలహంస లడుగిడె!!!

కవుల కొలను లోకి కలహంస లడుగిడె,
గనుడు కన్ను లార కవిత లెల్ల,
పూరణాలు కనక తోరణాలై దోచు,
మంద వారి మాట!మణుల మూట!!!
(శంకరాభరణం బ్లాగులో ఉద్దండు లైన కవి పండితుల సమస్యా పూరణలకు స్పందించి వ్రాసిన పద్యం)

దైవమున్నదె సుతునకు తల్లి కంటె!

వెతల నెన్నింటి కోర్చెనో వెలుగు నీయ,
బ్రతుకు తీపిగా జేసెను భవ్య రీతి,
అన్ని లోకమ్ము లందున నరయ వేఱె
దైవమున్నదె సుతునకు తల్లి కంటె! 

(శంకరాభరణం  బ్లాగు లో24 -10 -2010  నాటి సమస్యా పూరణ132 లో
ఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షింఛి ఆనందింప వచ్చును.) 

సొర చెట్టుకు బీర కాయ సొంపున గాచెన్!

ఎరువులు ఎచటివి వేసెనొ,
బరువులు తరువుకు తగవని భావింపగనో,
గురువులు బ్రహ్మము చెప్పెనొ !
సొర చెట్టుకు బీర కాయ సొంపున గాచెన్! 

(శంకరాభరణం  బ్లాగు లో 23 -10 -2010 నాటి  సమస్యా పూరణ-131 లో
ఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు. )

కవివరు కపితోడ బోల్చగా మెచ్చి రహో !

1) రవి గాంచని చోటుల నిల
    కవి గాంచును తన మనముతొ కవితలు సేయన్ ,
    కవి కొమ్మల గెంతి నపుడు,
    కవివరు కపితోడ బోల్చగా మెచ్చి రహో !

2 . రవియు తన కిరణములతో,
     కవి తనపద చరణములతొ గంతులు వేయన్,
     యువసతి కోతని తిట్టెన్
     కవివరు కపితోడ బోల్చగా మెచ్చి రహో !
(శంకరాభరణం బ్లాగులో  లోగడ  సమస్యా పూరణ-130 లో ఇచ్చిన సమస్యకు చేసిన పూరణ.
  ఇతర కవి మిత్రుల పూరణలను యీ బ్లాగులో చదివి రసాస్వాదన పొందవచ్చును.)

చవితి చంద్ర వంక చందంబుగా నుండు!!!

 ఓర్పు లేని నేర్పు ,మార్పులేనీకూర్పు,
 బాధ నార్ప లేని బడుగు  తీర్పు,
 చవితి చంద్ర వంక చందంబుగా తోచు !
 మంద వారి మాట! మణుల మూట!!!

గణ నాయకు గళము నందు గరళము నిండెన్ !!!

1) గణతంత్రపు భారతమున
    గణి యింపగ గలరు పెక్కు ,గర్వము మీరన్,
    రణ శూరులు, మును చైనా
    గణ నాయకు గళము నందు గరళము నిండెన్ !
2) గణపతుల నంప,విద్యుత్
    మణి కాంతుల మధ్య జలము మలినము కాగన్
    ఫణి భూషణు సుతు మనుగగ
    గణ నాయకు గళమునందు గరళము నిండెన్ !

(శంకరాభరణం బ్లాగులో లోగడ సమస్యా పూరణ -129 లో ఇచ్చిన సమస్యకు చేసిన పూరణ.బ్లాగులో ఇతర కవి మిత్రుల
పూరణలు చదివి ఆనందించ వచ్చును. 

బోధించుట రాని గురువె పుజ్యుండయ్యెన్ !!!

వేదించు టె పని పాటై,
శోధించును తప్పులన్ని చోద్యము తోడన్,
బాధించు మంత్రి కొడుకై,
బోధించుట రాని గురువె పుజ్యుండయ్యెన్ ! 
(శంకరాభరణం బ్లాగులో 20 -10 -2010 నాటి సమస్యా పూరణ  -128 లో ఇచ్చిన  పూరణకు చేసిన పూరణ.
ఇతర కవిమిత్రుల మేటి పూరణలను ఆ బ్లాగులో  చూసి రసాస్వాదన చేయ వచ్చును.

చర్చ లేవి లేవు, కుర్చీల సాక్షిగా !!!

 చర్చ లేవి లేవు, కుర్చీల సాక్షిగా ,
 శీత కాల సభలు, భీతి గొలిపె !!! 
 పార్ల మెంటు తీరు! పౌరులు బేజారు!!
 మంద వారి మాట ,మణుల మూట !!

కూడు, గూడు, గుడ్డ కుందేటి కొమ్మాయె!

రోజు గోటి పైన రోకటి పోటాయె,
ధరలు పెరిగి, బ్రతుకు నరక  మాయె,
కూడు, గూడు, గుడ్డ కుందేటి కొమ్మాయె!
మంద వారి మాట, మణుల మూట! 

కలలు దీరినాక కాసులు దెమ్మనె?

ఏరి,కోరి,పోరి,నారిని చేపట్టి
కాపు రమ్మువరకు కథలు జెప్పె !
కలలు దీరి పోయె  కాసులు దెమ్మనె?
మంద వారి మాట మణుల మూట! 

యతి, విటుడు గాక పోవునే యతివ బిలువ!

యవ్వనపు ప్రాయమున వాంఛ లెవ్వరికిని
మతుల బోగొట్టు, మగువల మనసు దోయ
వెతలు బలు రీతి బడుదురు, వెకిలి ప్రేమ
యతి, విటుడు గాక పోవునే యతివ బిలువ! 

(శంకరాభరణం బ్లాగులో 19 -10 -2010 నాటి  సమస్యా పూరణ -127
 లొ ఇచ్చిన సమస్యకు చేసిన పూరణ .తోటి కవిమిత్రుల యితర మేటి పూరణలను మీరు
 ఆ బ్లాగులో చూసి రసాస్వాదన పొందవచ్చును.)

చీకాకు పరిచి చివరకు!!!

చీకాకు పరిచి చివరకు,
ఏకాకిని చేసినారు, ఎదిగిన మేకై,
మాకేమి వదులు మెతుకని,
కాకా కేకే నటంచు కాకులు అరిచెన్! 

కోడలు మామ జూసి కను గొట్టెను రమ్మని సైగ జేయుచున్ !.

మేడలొ దూరినారు కను మేరన కాంచి(చ)న భూషణాల, కై
దాడిని జేసినారు నవ దంపతులిర్వురి గట్టి వేసి, నో
గోడకు నెట్టిరా ధములు కోమలి నోటిన మాటరాక ,నా
కోడలు మామ జూసి కను గొట్టెను రమ్మని సైగ జేయుచున్ !.
వేడెను వేల్పు లెల్లరను వీరిని వారిని జాబు కోసమై
వీడెను మబ్బులట్లు తన యిక్కటు లన్నియు,మంచి జీతమే
జూడగ, చూడగా కుదిరె జోడు, సహోదరి ముద్దు కూతురే ,
కోడలు మామ జూసి కను గొట్టెను రమ్మని సైగ జేయుచున్!

(శంకరాభరణం  బ్లాగు లో 03 -10 -2010 నాడు వారాంతపు సమస్యా పూరణ లో
ఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు. )

చేప చిక్క కుంటె,చెఱువు తప్పెట్లౌను?

 చేవ లేక పరుల చేతలు నిందించ ,
విజయ మెట్లు వచ్చు విశ్వమందు!
చేప చిక్క కున్న చెఱువు తప్పెట్లౌను?
మంద వారి మాట మణుల మూట !!!

పాహియని వేడితే పరమ పదమే నంట!!!

శశి ధరుడు,
విషగళుడు,
శుభకరుడు ,
భవహరుడు,
శివుడు,ఉమాదేవి విభుడు,శివుడు !!!
విశ్వజన హితమునకు విషము ద్రాగిన వాడు,
కోడెనాగుల దండ మెడను దాల్చిన వాడు,
పులితోలు వలువగా మొలను జుట్టిన వాడు,
శూల డమరుకములను కేల బట్టిన వాడు,
శివుడు  శోకమాపకుడు,.శివుడు!
కోరితే తీరైన వరము లిచ్చునటంట,
ముడుపు కడితే చాలు యిడుము లెడ మౌనంట,
మ్రొక్కితే ముక్కంటి  ముక్తి నొసుగునటంట,
పాహియని వేడితే పరమ పదమే నంట!
శివుడు లోక బాంధవుడు, శివుడు!!!

సీతా !మానస చోరు డెవ్వడనినన్ శ్రీ కృష్ణ మూర్తే గదా !!!

మాతాజానకి నిన్ను నే ను గొలుతున్ మాపాలి దైవంబుగా
నాతో డె ప్పుడు వీడ కుండుము సదా నా భాగ్య సంధాయినీ
నీతో జెప్పెద జాంబవంతుని సుతన్ నీ రాము తో జెప్పవే
సీతా !మానస చోరు డెవ్వడనినన్ శ్రీ కృష్ణ మూర్తే గదా ! 
(శంకరాభరణం బ్లాగులో 18 -10 -2010 నాటి వారాంతపు సమస్యా పూరణ -13
 లొ ఇచ్చిన సమస్యకు చేసిన పూరణ .తోటి కవిమిత్రుల యితర మేటి పూరణలను మీరు
 ఆ బ్లాగులో చూసి రసాస్వాదన పొందవచ్చును.) 

సోనియా వెలుగై వరముల దానము చేసిన,!!!

దీనుల చీకటి బ్రతుకులు,
హీనముగా మారె ధరలు హెచ్చుట చేతన్!
సోనియ వెలుగై వరముల
దానము చేసిన,మనమున దైన్యత తొలుగున్!!!

(శ్రీమతి సోనియాగాంధీ గారికి జన్మదిన శుభాకాంక్షలు.)

కృష్ణు! జంప నెంచి క్రీడి వెడెలె!!!

భీష్మ తీక్షణoపు భీకర పోరును,
నోపలేక శౌరి నోర్మివీడె!
వీరు డుండ!, రాదు విజయమ్ము,ననిజెప్పె
కృష్ణు! జంప నెంచి క్రీడి వెడెలె!!! 

(శంకరాభరణం  బ్లాగులో సమస్యాపూరణం-163  లొ ఇచ్చిన సమస్యకు చేసిన పూరణ )

లంగా నెత్తి లతాంగి చెంగు మనుచున్ లంఘించె దైత్యేంద్రు పై ..!!!

శృంగార జ్వర రోగ పీడితు లిలన్ చూడంగ నున్నారుగా 

శృంగారంబను రాగ భూతము మదిన్ చిత్రంబుగా జేర , దై
త్యాంగన్ తా చరబట్ట లేచి మద పైత్యంబెక్కి , పైపైన , వా
లంగా నెత్తి లతాంగి చెంగు మనుచున్ లంఘించె  దైత్యేంద్రు పై ..
(శంకరాభరణం బ్లాగులో లోగడ యిచ్చిన వారాంతపు సమస్యా పూరణకు చేసిన పూరణ.)

భవ దీయుల మమ్ము బ్రోవు బాధలు దీరన్ !!!

భవ మోచని, కాత్యాయని,
భవ దీయుల మమ్ము బ్రోవు బాధలు దీరన్
నవవిధ పూజలు సేతుము,

నవరాత్ర్యుత్సవము లమరె నాలుగు దినముల్ !

(శంకరాభరణం  బ్లాగులో  లోగడ యిచ్చిన సమస్యా పూరణం-121  కి చేసిన  పూరణ.)

కడకు ప్రజల బ్రతుకు , కన్నీటి పాలురా!

పాలకులకు జూడ పాలుగా కనుపించు,
వైరి పక్షముకవి నీరు తీరు !
కడకు  ప్రజలకవియె కన్నీరుగాతోచు !
మంద వారి మాట మణుల మూట!!!

భార్య లిద్దరు, శ్రీ రామ భద్రునకును !

ఇడుము లనెడము జేయువాడిన కులేషు
డొక్క డేయని దలపోసి మ్రొక్కి నారు
ప్రభువు దక్కగా, చిక్కగా, ప్రభువు దేవు
భార్య లిద్దరు, శ్రీ రామ భద్రునకును ! 
(ప్రభుదేవ్ ప్రఖ్యాత  డ్యాన్సు మాస్టరు  మరియు నటుడు .ఆయన సమస్యను
 సమస్యా పూరణంలో తీసుకోవడం జరిగింది.)
(శంకరాభరణం బ్లాగులో లోగడయిచ్చిన సమస్యకు  చేసిన పూరణ ). 

పుడమి తల్లిని సేవించి పూజ్యులైరి !!!

పదులు వందలు వేలను పక్కనెట్టి
పుడమి తల్లిని సేవించి పూజ్యులైరి
ఎదగడానికి ఎన్నెన్నొ ఎత్తుల మర
చదువు రానట్టి వారె విజ్ఞాన ఖనులు
(శంకరాభరణం  బ్లాగులో లోగడ ఇచ్చిన సమస్యకు చేసిన పూరణ)

గతి తప్పిన రావణపురి గాల్చెన్ కూల్చెన్!!!

అతులిత బలధాముడు,కడు
చతురతతో రఘుకులపతి సతియగు సీతన్,
వెతుకగ మారుతి  జొచ్చెన్,
గతి తప్పిన రావణపురి గాల్చెన్ కూల్చెన్!!!

ఎలుక ఎగిరి దూక ఏనుగు బెదురునా!

ఎదుటి వాని బలము ఏమాత్ర మెంచక,
బరిలొ దిగిన గలుగు భంగపాటు!  
ఎలుక వెక్కిరించ  ఏనుగు బెదురునా!
మంద వారి మాట మణుల మూట!

సుచరితులెవ్వరు మెచ్చరు!

ఉచితానుచితములు మరిచి,
విచలితులుగ జేయు మాట విధమును చరితన్,
సుచరితులెవ్వరు మెచ్చరు!
వచియించిన చతుర మతిన వసుధయె వశమౌ!!!  

గౌరికుమారరార మము గావగ!!!

గౌరికుమారరార మము గావగ రావగదేల? మేము మీ
వారలమేర! మమ్ములను వర్ధిల జూడగ నేరమౌర?మా
వారును వారివారి పరివారము వారల బ్రోవుమంచు,బం
జారులు పూజ సేయగని సాధు జనుల్ పులకించి రెల్లరున్!  

(శకరాభరణం బ్లాగులో 3 .11 .10 నాడు వారాంతపు సమస్యాపురణ -14 లో  ఇచ్చిన  సమస్యకు చేసిన పూరణ .)

సిరిపురిలో బుట్టలేదు,చింతామణిగా !

సిగన నెలరాశి చిద్విలాసి, జడ సుడిన
పరుగుల తరంగ గంగ,సగాన పారు,
విలయ కారుని విలక్షణ విశ్వరూప,
రూప్యమున కారు డాలర్లు గోప్యమనర.
కరమున కాసులు చాలవు
సిరిపురిలో బుట్టలేదు,చింతామణిగా
ఎర వేయగ బెట్టన్ ఏ
కరువు, మగన కంపుమూట కష్టము దీర్చెన్. 

( లోగడ శంకరాభరణం బ్లాగులో చేసిన పూరణలు)

చదువుల్నిచ్చెడు, వాణినే గొలుతు, నా సర్వస్వ మర్పించుచున్ !!!!!

నదియా గౌతమి తీరమందు వెలిసెన్ నవ్య ప్రభల్ జిమ్ముచున్ ,
నదియే బాసర! వాసియై భువికి కి యానందమ్ము జేకూర్చగా,
హృదిలో భక్తిసరాగముల్ గలుగ యా యుల్లాస హాసాన యా
చదువుల్నిచ్చెడు, వాణినే గొలుతు, నా సర్వస్వ మర్పించుచున్ !

(శకరాభరణం బ్లాగులో(13-10 -2010) దత్తపది-8 లో యిచ్చిన "నయా, కియా,దియా,గయా  ."పదాల నుపయోగించి
ఏ వృత్తములో నైనా ఇష్టదేవతా  ప్రార్థన జేయవచ్చునన్న దత్తపది కి స్పందించి వ్రాసిన పద్యం )    

తిరుమల గిరి వేంకటపతి తీరెను కొలువై!

తిరుపతి నగరపు సిగపై
తిరుమల గిరి వేంకటపతి తీరెను కొలువై!
అరిచిరి అలిపిరి నుండే
మురిపెపు మూటల ముడుపులు ముంగిట దింపన్ !

పిలిచిన పలుకగ లేవా!
అలిసితివా?కలిసి సోలిసి అలివేణులతో!
వెలిసెను  తమ ఇలవేల్పని
తలిచిరి పలువురు!నినుగన తరిలిరి గొలువన్!  

మనిషి మనిషేల మనిషౌను? మహిష మౌను!

మనిషి ,మనిషిని,మనిషిగ మదిని గనని,
మనిషి మనిషేల మనిషౌను? మహిష మౌను!
మదము మనిషిని,మనుసును మలిన పరచు,
మనసు నిండుగా మమతున్న మనిషె మనిషి!

ఏదారిన పరుగిడెనో ?

పాదాలు లేక పరుగులు,
రాదారుల యందు ఏల రాజకుమారా,
ఏదారిన పరుగిడెనో ,

ఆదాయపు పన్ను గట్టె అచ్చెరు వొందన్!

ప్రీతి గొలిచిరి శ్రీరాము త్రేత మందు !!!

నృపుల కనులార గాంచిరి కృతము లోన
ప్రీతి గొలిచిరి శ్రీరాము త్రేత మందు
నేటి నేతల దలుపగా ఏటి కంచు

కాంక్ష లుండవు ప్రజలకు కలి యుగమున!

ఎదుగు బొదుగు లేని వదరు బోతులు నూట...

పాడి యైన మాట పగవాడు పలికినా,
వినగ తగును విధిగ విమల మతులు!
ఎదుగు బొదుగు లేని వదరు బోతులు నూట
పదుగు రాడు మాట పాప మగును !

మత్తు గుమ్ముగా మనిషిని చిత్తు జేయ!

పాడ,పదముల పరుగుల పట్టు రాక,
ఆడ, తడబడి గడిబిడి అడుగు  లేయ,
మత్తు గుమ్ముగా మనిషిని చిత్తు జేయ,
రాగ తాళ దారిద్ర్యమ్ము రక్తి కట్టె!

కోరి వచ్చె పదవి పోరు లేక !!!

మార్పు జరిగి ముఖ్య మంత్రయ్యె స్పీకరు,
కిరణు రెడ్డి మనసు మురిసి మెరిసె,
సోని యమ్మ కరుణ సోకెరా రెడ్డిపై!
కోరి  వచ్చె పదవి  పోరు  లేక !!!   

శ్రీ కిరణ్ కుమార్ రెడ్డి గారికి శుభాకాంక్షలు!!!!! 

కాకి గోల జేసి పీక్కుతింటుంటారు!

ప్రజల సొమ్ము పైన పట్టింపు లేదురా!
పార్ల మెంటు లోని పాలకులకు,
కాకి గోల జేసి కేకలేస్తుంటారు
మంద వారి మాట మణుల  మూట!

(గత కొన్ని రోజులుగా పార్లమెంటు జరుగుతున్నతీరు ఆవేదన కలిగిస్తుంది
  సమావేశం ప్రారంభం కావడం,అతి పెద్ద కుంభ కోణముపై J P C వేయాలని,
  ప్రతి పక్షాలు పటుబట్టడము,అంతే పట్టుదలతో అధికార పక్షం J P C వేయడము కుదరని
  బెట్టు చేయడం కొద్ది రోజులుగా జరుగుతున్నతంతు.అసలే లక్షా డెబ్బది వేల కోట్ల స్కాం అని
  అంటున్నారు.పార్లమెంటు సమావేశాలకు నిముషానికి కొన్ని లక్షలు ఖర్చు అవుతుందని
  లెక్కలు చెప్పేది వాళ్ళే! ప్రజా ధనాన్ని ఇలా దుర్వినియోగము చేసేది వాళ్ళే!జవాబు దారితనము
  లేనే లేదు, ఆపై అధికారానికి ప్రాకులాట.అవినీతికి ఆస్కార మిచ్చేది,అవినీతిని పెంచి పోషించేది,
  అవినీతిని సర్వ శక్తులోడ్డి రక్షించేది ప్రభుత్వమే నని సామాన్యుల కనిపిస్తుంది.అందులో అతిశయోక్తి
  లేదు.
 గత 60 ఏండ్లలో  అవినీతి తో దోచి ,విదేశాలకు తరలించిన సంపద లెక్కలు తెలుసుకొంటే మీరు
 ఆశ్చర్య చకితు లౌతారు .వివరాలకు "మీ కోసం"బ్లాగు లోని "భారత దేశం  లోని అక్రమ
 సంపాదకులు 1948  నుండి  2008  వరకు 20 లక్షల కోట్ల డబ్బును విదేశాలకు తరలించేరు "
 అన్న 22 -11 -2010 తేది పోస్టును  చూడండి.ఇదంతా మనదేనా అని గుండెలు బాదుకుంటారు.)

ధర్మ రాజు గలిగె తమ్ముల నలుగుర!

ధర్మ రాజు గలిగె తమ్ముల నలుగుర
గాలి కొడుకునకును గలరు మువురు
నరుని కిరువురు మరి నకులుని కొక్కరే
పంచ పాండ వులన పదుగురు కద !

(నలుగురు +మువ్వురు  +ఇరువురు +ఒక్కరు = పదుగురు.)
  4+3 +2 +1 =10 .

ప్రతిభ ఎంత గలదొ పౌరాణికము లందు
పదిలొ కెళ్ళి డీవొ ప్రశ్న లడుగ
చెప్పు వారి గనక చెప్పెను పంతులే
పంచ పాండ వులన పదుగురు కదా ! 
( పది లొ =పదవ తరగతి ,డీవొ = D E O  సరదాగా వ్రాసినది ఎవరినీ నొప్పించాలని కాదు విద్యార్ధులకు ఉపాధ్యాయులకు క్షమాపణలతో}

వన్నె లాడి వలచి, వెన్నంటి వచ్చిన?

ఇంద్ర సఖుడుగాదు, ఇంతుల నెఱుగడు,
వేద మంత్ర పఠన, వేల్పు కొలువు,
వన్నె లాడి వలచి, వెన్నంటి వచ్చిన
చంద్ర ముఖిని జూసి జెడిసెనయ్యొ !             

అర్ధ రాత్రి సతిని అచ్చోటె వదిలేసి!,

అర్ధ రాత్రి సతిని అచ్చోటె వదిలేసి,
దిగెను సెల్లు కొఱకు దిగులుపడక
తల్లి ,పిల్ల  కంటె సెల్లంత  ముఖ్య మా?
మంద వారి మాట మణుల మూట!

(ఇది 15 -11 -2010 నాడు జరిగిన సంఘటన.మేము ప్రయాణిస్తున్న  షిర్డి నుండి సికింద్రాబాదు ట్రైన్ నంబర్7001 . స్లీపర్ S8 కోచ్ లో తోటి ప్రయాణికుడు అర్ధ రాత్రి పూట 3 గంటల సమయాన   పర్భని -ఉస్మానాబాద్ మధ్య సెల్లు టాయిలెట్ లో జారి పడిందని ,భార్య దగ్గరలో ఉన్న సెల్లును కుడా తీసుకొనివెంటనే రైలును దిగేసాడు.పాపం ఆమె కళ్ళ నీళ్ళ పర్యంత మైంది.ఇద్దరు చిన్నపిల్లలు ,మూడు పెద్ద మూటలు.ఆవిడకు రెండు సమస్యలు భర్త చీకట్లో అర్ధ రాత్రి పూట సెల్లు వెదుకులాటలో ఎన్ని అవస్థలు
పడ్తున్నాడో , ఇంటికి ఏలా రాగలడో అని ఒకటి, తనకు తన భర్త సెల్ నెంబర్ మాత్రమే జ్ఞాపకం ఉంది.దానికి కాల్ చేస్తే స్విచ్ ఆఫ్ అని వస్తుంది .తన సెల్ నెంబర్ కాని, ఇతర బంధువుల సెల్ నెంబర్లు గాని జ్ఞాపకము లేవు.ఇంటికి ఏలా చేరాలి అనే బాధ మరొక వైపు.అలా రాత్రంతా బాధ పడుతూనే ఉంది .మేము ధైర్యం చెప్పి ,ఆమెకు తోడుగా ఉండి,వారి పిల్లల్ని ,సామాన్లను మా సామాన్ల తో పాటు మోసి,సికింద్రాబాద్ స్టేషన్ బయటకు వచ్చి వారిని దగ్గరలోనే ఉన్న వారి బంధువుల ఇంటికి సురక్షితంగా పంపించడం జరిగింది. మరునాడు ఆవిడ మాకు కాల్ చేసి    తనభర్తతెల్లవారురాత్రి11గంటలకుఇంటికివచ్చినట్లుతెలిపింది,కృతఙ్ఞతలుతెలియజేస్తూ! .సెల్లు మాత్రం దొరకనే లేదట!  ప్రయాణంలో సెల్లులను జాగ్రత్తగా పెట్టుకోవడము,ముఖమైన సెల్ నెంబర్లను వేరేగా వ్రాసి పెట్టుకోవడము ఎందుకైనా  మంచిదని అనిపించింది.అతను అలా వెళ్ళడం ఎంతవరకు సబబో మీరే చెప్పాలి?)
  
                                                                                               

సూటి పోటైన మాటల ధాటి ఘాటు!

సూటి పోటైన మాటల ధాటి ఘాటు,
చేటు చేయును, స్నేహము బీటవారు,
కాటి కట్టెలా కడదాక కాల్చుచుండు,
ఈటెలే మేలు బాధించు మాటకంటె!

రుద్రుని భజించువాడు దరిద్రుడగును!

చపల చిత్తముతోనెంత తపన జేయ
గలుగ నేరదు సిద్దియు ,కలిమి రాదు!
నిద్ర మత్తులో మునిగిన ముద్ర లోన
రుద్రుని భజించువాడు దరిద్రుడగును!

వెండి కొండపై నివసించు వేల్పు ఎవడొ,

వెండి కొండపై నివసించు వేల్పు ఎవడొ,
ముక్తి దాయకుండఖిలాండ శక్తి ఎవడొ ,
అట్టి జగజెట్టి ముక్కంటి ఆత్మలోని
భూత ములకు బ్రణతుడయ్యె బురహరుండు !

హరిసంకీర్తన యిడుముల నార్చును,

కార్తీ కమ్మున గిరిజా

మూర్తిని, కీర్తింప గలుగు మొక్షము! హరిసం 

కీర్తన యిడుముల నార్చును,

ఆర్తుల కోర్కెలు దీర్చును,అనితర కీర్తిన్!

శ్రీరమ కన్నుదోయి మురిసెన్ హరి చిన్మయ రూపు గాంచి,శ్రీ 

గౌరియు ఈశుజేరి మమకార సరాగపు డోలలూగె,వా  

ణీ రమణీయమై కమల నేత్రుని నాథుని  ప్రీతిజేసె,శృం 

గారత మీరగా పతుల గానము జేసిరి మొహనంబుగా!

ఆయ కట్టు లేక ఆంధ్రలో ప్రాజెక్టు!!!

ఆయ కట్టు లేక ఆంధ్రలో ప్రాజెక్టు,
కట్టి రంచు వార్త పుట్టుకొచ్చె,
గుడ్డి పాలనంత చెడ్డవింతలసంత!
మంద వారి మాట మణుల మూట!

(11-11-2010 నాటి ఈనాడు దిన పత్రికలో "కాల్వలు తవ్వాక ఆయకట్టు వెదుకులాట"
శీర్షికన  "హింద్రి  నీవా" పై వచ్చిన వార్త చూసి వ్రాసినది ) 

దీన జనుల సేవ దివ్య మార్గమ్మనె!

సాయి షిర్డి లోన సత్యమై వెలిసెను,
సాయిని  గన గలిగె సంతసంబు,
దీన జనుల సేవ  దివ్య మార్గమ్మనె,
మంద వారి మాట మణుల మూట!

సాయికి సత్య కీర్తికిని,సద్గురు సద్గుణ సాధు మూర్తికిన్,
హాయిని గూర్చ మంగళపు హారతు లిచ్చిరి సజ్జనోత్తముల్,
శ్రేయము సేవ మార్గమని చేతల జెప్పిన చిద్విలాసి! నే
నాయువు గల్గునన్ వరకు ఆయన మార్గమె  నాశ్రయించెదన్ !!!

(బాబా గారిని షిర్డి లో 14 -11 -2010 నాడు దర్శించు  కొన్న
 సందర్భములో కలిగిన అనుభూతికి అక్షరరూపం )

పిల్లలు తారా జువ్వలు,పిల్లలు నవ్వుల ముల్లెలు,

బాలల దినమును (14 -11 -2010 ) పురస్కరించుకొని వ్రాసిన కవితలు .

కల్లలు తెలియని వారము,
యెల్లలు మామధ్య లేవు,యెపుడును మా మా
యుల్లము లందున స్నేహపు
జల్లులె కురియును తరగని  జయములు కలుగున్ !

పిల్లలు నవ్వుల ముల్లెలు,
పిల్లలు చల్లని  పిడుగులు  ,ప్రేమపు జల్లుల్,
పిల్లలు తారా జువ్వలు,
పిల్లల యల్లరె పుడమికి పెన్నిధి చూడన్ !

పసి బాలుడు మద్యమడిగె పాలొన్నననెన్ !

ముసి ముసి నగవుల బుడతడు
పసి వయసునె తన జనకుని పద్దతి గాంచెన్,
దసరకు మాత్రమె తండ్రికి,
పసి బాలుడు మద్యమడిగె పాలొన్నననెన్ !

అసుర పురిలోన జరిగిన ,
నిసి రాతిరి వేడుకలలొ నేమని చెప్పన్
అసురుల ఏలిక,నతి రూ
పసి,బాలుడు మద్య మడిగె పాలొన్న నన్ !

మంచి చెడుల చర్చ మాన్యులే జేతురు,

మంచి పనులు చేసి మరిచి పోవుట మేలు,
డప్పు వేసి గొప్ప చెప్ప తగదు,
మంచి చెడుల చర్చ మాన్యులే జేతురు,
మంద వారి మాట!మణుల మూట!

సెల్లు లన్ని మాయ బల్లులై పోవంగ,

లాలు,బాబు గూడి లండనుఏలంగ,
లాడెనన్న దొరికి లాస్యమాడ,
సెల్లు లన్ని మాయ బల్లులై పోవంగ,
భాస్కరుడుదయించు(చె)పడమటి దెస !

రోషమ్మును వీడు వాడె రోషయ్య యగున్!

వేషము మారగ నేరడు
భాషయు విన సొంపు గొల్పు,పరువుకు లేదే
దోషము భేషజ మెరుగడు
రోషమ్మును వీడు వాడె రోషయ్య యగున్!

చేటు కాలమొచ్చె, చెప్పినా వినరాయె!

   చేటు కాలమొచ్చె, చెప్పినా వినరాయె,
   తాగి కారు తోల, తలలు పగిలె,
   బుద్ది మొద్దు బార సుద్దులు నిలుచునా!
   మంద వారి మాట!మణుల మూట!

ఆదా సేయగ కావలె

ఆదా సేయగ కావలె
ఆదాయపు వనరులు పలు ,అoధుoడేలా
ఆధారము లేక నడుచు
ఓదార్పులు సేయువాని కోరిమి లేదే !

సింహములకు నుండు చిలిపి దోమల బాధ !

జనుల హితము కెట్టి పనులెన్ని జేసినా,
తృప్తి కలుగ బోదు తృణమె యగును
సింహములకు నుండు చిలిపి దోమల బాధ !
మంద వారి మాట!మణుల మూట!

చను పాలకు డబ్బపాలు సరిపో గలవా?

పెనిమిటికి రాణి మగనికి
చను పాలకు డబ్బపాలు సరిపో గలవా?
ఇనుమునకు కనక పూసలు
కను బొమలకు మీసము గన్నెర్ర గదా!

తెలుగు పలుకు లందు తేనె లొలుకు,

  తెలుగు అక్షరంబు  తేజంబు ప్రాణంబు,
  తెలుగు పలుకు లందు తేనె లుండు ,

  భాష లందు వెలుగు,బంగారు  తెలుగురా!

  మంద వారి మాట!మణుల మూట!

తెలుగు బాల! తెలుగు పలుక వేల?

 తెలుగు అక్షరంబు  తేజంబు ప్రాణంబు,
 తెలుగు పదము లందు  తేనె లొలుకు

 భాష లందు వెలుగు! బంగారు  తెలుగురా !

 తెలుగు బాల! తెలుగు పలుక వేల?

డబ్బు, డబ్బు, డబ్బు, డబ్బేర సర్వము,

డబ్బు, డబ్బు, డబ్బు, డబ్బేర సర్వము,
డబ్బు తల్లి,దండ్రి,డబ్బు సఖుడు,
డబ్బు లేని బ్రతుకు మబ్బురా మహిలోన,
మంద వారి మాట మణుల మూట !

డబ్బు పైన ప్రేమ,డబ్బుపై పేరాశ ,
తగదు గాక తగదు,తగదు తగదు,
అవసరమును మించి నత్యాశ చేటురా
మంద వారి మాట మణుల మూట!

(ధనం మూలం మిదం జగత్ ,అన్నారు పెద్దలు. ధనం, జీవన గమనంలో
అతి ముఖ్య మైనది అని  అందరు చెబుతారు మన అనుభవమూ చెబుతుంది,
అన్నింటికీ కావలసింది డబ్బే!అది లేకుంటే ఏది కదలదు ఏదీ జరగదు. కడుపు నిండదు,
 కాలు ముందుకు పడదు.అందుకే చతుర్విధ పురుషార్థ ములలో అర్థము
 అతి  ముఖ్య మైనదని  చెబుతారు పెద్దలు.అలాగని డబ్బే సర్వస్వము కాదు
ఆత్మీయత ,అనుబంధం ,అనురాగం, ఆప్యాయత ,మానసిక ఆరోగ్యం
ఇవన్ని డబ్బుతో కొనుక్కుంటే వచ్చేవి కావు.ధనమును సంపాదించే మార్గాలపైనే
అంతా ఆధారపడి  ఉంది.డబ్బు మీద తగని ప్రేమ,మొహం ,స్వార్థ  బుద్ది ఇవియే
అన్ని అనర్థాలకు హేతువులు.ధనార్జనకు ధర్మ మార్గానుసరణ యే అభిలషణీయం.
అది న్యాయం కూడ.నైతిక విలువలను తుంగలో త్రొక్కి,అవినీతి మార్గాలలో
అక్రమార్జన జేయడం ,అన్నీ తమకే కావాలనే దురాశ అన్నీ అవకతవలకు కారణం
అందుకే డబ్బును ఆర్జించడములో,వినియొగించడములో విచక్షణతో మెలగడమే
ఉత్తమం.)
అందరికీ దీపావళి శుభాకాంక్షలు.   .   

పుట్టుటయె గాని గిట్టని పుణ్యజీవి

పుట్టుటయె గాని గిట్టని పుణ్యజీవి
ఉనికి నూహించఁ దరమె యీశునకు నైన
సుధను గ్రోలిన సురలను చూచి నామె?
పుట్టి నప్పుడే లిఖియించు గిట్టు మనుచు.

పండు ముసలి దెచ్చి కొండపై వదిలిరి,

   పండు ముసలి దెచ్చి కొండపై వదిలిరి,
   కన్న తల్లి పట్ల కఠిను లైరి  ,
   తనయు లైన వారి  తలపండు  పగలదా !
   మంద వారి మాట మణుల మూట!

(పొట్టి శ్రీ రాములు నెల్లూరు జిల్లా వాసులు తమ కన్నతల్లిని
మభ్యపెట్టి తెచ్చి తిరుమల కొండపై వదిలి వెళ్ళిన ఉదంతం నిన్న
TV9 లో చూడ  కళ్ళలో నీళ్లుతిరిగాయి .తనను వదిలించు కోవడానికి
తన తనయులు పన్నిన పన్నాగానికి బలై ,చిగుటాకులా వణుకుతూ
ఆ మాతృమూర్తి పడుతున్న  ఆవేదన ,ఆమె హృదయ వేదన నిజంగా
కదిలించి వేసింది. ఆమె ఎప్పటినా తన వారలను చేరుకోవాలని కోరుకుంటున్నాను)  

  

చదువులమ్మ గుడిన బుధుల కేమాయెనో!

మనుమ రాలి వయసు మగువను మనువాడ ,
డెబ్బ దేండ్ల కెట్టి జబ్బు పుట్టె  ?
చదువులమ్మ గుడిన బుధుల  కేమాయెనో!
మంద వారి మాట మణుల మూట!
(బాసర దేవాలయంలో డెబ్బై ఏండ్ల  వృద్దుడు
13 వత్సరాలు నిండని బాలికను బంధువుల,భక్తుల
సాక్షిగా పెళ్లి చేసుకున్నట్లు, ''ఈనాడు''పత్రికలో వచ్చిన
వార్తకు స్పందించి వ్రాసిన పద్యం యిది.దురాచారము
నశించు గాక.)

మనసెoతొ వగచెరా!

తెలుగు లలిత కళల వెలుగైన పేరును ,
సుబ్బి రామి రెడ్డి డబ్బులిచ్చి,
మబ్బు సేయ బూన మనసెoతొ  వగచెరా!
మంద వారి మాట మణుల మూట!

బైబులు తో పాటు చదివె భగవద్గీతన్.

వైభవ ఏసు చరిత్రను ,
యీ భువి  జనములకు తెలిపి యిడుములు దీర్పన్
రాబర్టు దీక్ష తోడను

బైబులు తో పాటు చదివె భగవద్గీతన్.

కేబులు రాకన్ , సాయికి
సైబరు కేఫుకు జనుటకు సైకిలు లేకన్,
టేబులు పైనన్ బెట్టిన

బైబులు తో పాటు చదివె భగవద్గీతన్ .

(సాయి యశ్వంత్ మనుమని పేరు ) 
(శంకరాభరణం  బ్లాగులో లోగడ ఇచ్చిన సమస్యకు చేసిన పూరణలు.)

జ్వర పీడితుడచటి నుండి జారుకొనె !

స్వరపేటిక చెడి పోయెను,
సరిగమలను పలికి పలికి సాధన లోనే, 
బరిలో నిలువక, రాగ  
జ్వర పీడితుడచటి నుండి జారుకొనె గదా!

మూఢ నమ్మకాలు ముప్పురా ప్రగతికి !!!

చేత బడులు  నమ్మి చేతులు  గాల్చిరి,
చేత లందు యముని దూత లైరి,
మూఢ నమ్మకాలు ముప్పురా ప్రగతికి !!!
మంద  వారి మాట మణుల మూట!

(కొన్ని రోజుల  క్రితమే చేత బడుల నెపమున ఒక  వృద్దున్ని
గ్రామస్తులు కొందరు సజీవ దహనము చేసిన సంఘటనను
మరువక  ముందే మళ్లీ మొన్న ఒక మహిళ చేతుల్ని
కాల్చిన సంఘటన వెలుగులోకి వచ్చింది.ఇలాంటి దురాగతాలు
అందరికి బాధ కలిగించేవే . అవిద్యనే వీటికి మూల కారణము.
ప్రజలను చైతన్య వంతుల చేయడమొక్కటే దీనికి విరుగుడు .
కొన్ని సంస్థలు ఇప్పటికే నడుం బిగించాయి.ఆయా ప్రాంతాలలో  ఉన్న
విజ్ఞులు కూడ సహకరిస్తే  ఇలాంటివి కొంత వరకు తగ్గ వచ్చు .)
   

పరమ పావను ముద్దాడె పార్వతమ్మ!

చిన్న మనుమడు గీసిన చిత్రమందు,
పరమ పావను ముద్దాడె పార్వతమ్మ!
పంచదారను సిగపైన నుంచె నేమొ,
చందమామను ముద్దాడ సాగె చీమ!

చేటు గూర్చు పనులు జేయ నేల?

 పాటి యైన పనుల దాట వేయగ నేల?
 చేటు గూర్చు పనుల జేయ నేల?
 ఊరు నొచ్చు పనుల కుపయోగ ముండునా!
 మంద వారి మాట మణుల మూట!

హనుమంతుని పెండ్లి

వనచర యోధుని మదిని మ
దన భావన కలుగ లేదు; దాని కతము రా
వణుఁడో, రాముఁడొ, వాలియొ
హనుమంతుని పెండ్లి కెన్ని యాటంకములో!.

ఎదుటి వాని చెవిన ఎక్కు వరకె!

బానిసౌను మనకు పరమ రహస్యమ్ము,
పరుల చెవుల లోన పడెడు వరకు
నిజము, పడిన యంత యజమాని మనకౌను!
మంద వారి మాట మణుల మూట!

గాలి నీరు నేల కలుషిత మైపోవ

ప్రాణవాయు విచ్చి ఫలపుష్పములనిచ్చి ,
జీవ జాతి కెల్ల చేవ నిచ్చి,
గాలి నీరు నేల కలుషిత మైపోవ
పచ్చనైన చెట్టు భగ్గు మనెను.

నాన్న కన్న మిన్న

అన్న లందు మేటి,అలనాటి రామన్న,
ఎంటి యారు తెలుగు యింటి  అన్న,
నాన్న కన్న మిన్న నా అన్ననేకదా !
మంద వారి మాట! మణుల మూట!
 (మా  అన్న శ్రీ మంద నారాయణ గారి ఆశీస్సులతో ముందుకు సాగుతున్నాను.)

విద్య వివేకము

వీరు,వారు వాడ, విద్య వివేకమ్ము,
తరుగ బోవు నెపుడు ,  పెరుగు చుండు,
నీరు బావి లోన ఊరు విధమ్మున,
మంద వారి మాట! మణుల మూట!

వెధవగ దోచున్

కని పించిన వారలకున్ 
కని పించిన వన్ని జెప్పి కథ వినిపింపన్
మనమున విసుగని పించును
వినువారికి చెప్పు వారు వెధవగ దోచున్!

ఆడి తప్పగ రాదు!

      అతిగ వాగరాదు నాడి తప్పగ రాదు 
      ఎండి నట్టి మండ నెక్క రాదు!
      పరువు పోవు,కాలు పట్టును గోల్పోవు,
      మంద వారి మాట మణుల మూట!
    

అధము గొలువ నెపుడు అవమానముల పాలె,

అల్పు లైన వారి నాశ్రయించగ  రాదు,
చెడ్డవారి చెంత చేర రాదు.
అధము గొలువ నెపుడు  అవమానముల పాలె!
మంద వారి మాట మణుల మూట!

మనుసు యంత్రమైతె

   మనిషి రోబొ కాగ మార్గము సులువాయె
   రోబొ మనిషి యైన రోష మొచ్చె,
   మనుసు యంత్రమైన  మమతల గతియేమి ?
   మంద వారి మాట మణుల మూట !

గాడిద అరిచెన్!

ఏ పని చేయక ,సోమరి యై ,జులాయిగా దిరుగే ఎదిగిన
కొడుకును కోపం తో "పనికి రాని గాడిదా " అని ఓ తండ్రి
తిట్టగా ,ఆ ప్రక్కనే ఉన్న పరువు గల గాడిద ఏలా అరిచిందో
వినండి!
             పని చేయని ప్రతి వెధవను,
             తనతో సరిజేసి బోల్చ తగదని జెప్పన్,
             తన పరువును తీయొద్దని ,
             ఘనముగ బరువులు మోసెడు గాడిద అరిచెన్!          

           

కష్ట సుఖాలకు కారణాలు

  కలిమి లేములకును కష్ట సుఖాలకు,
  కారణాలు దెలియ గలమె మనము ,
  పూర్వ జన్మ సుకృత పుణ్యాల ఫలమేమొ !
  మంద వారి మాట మణుల  మూట !

వేద సార మంత వేమన జెప్పెరా !

    ఏర్చి,కూర్చి,పేర్చి ఎన్నెన్నొ నీతులు
    మూడు పదము లందు మృదువు గాను,
    వేద సార మంత వేమన   జెప్పెరా !
    మంద వారి మాట మణుల  మూట 1
   (వేమన పద్యాల స్పూర్తే ,ప్రేరణే యీ నా మాట}

క్షణము దాట ఏది క్షీణించునో గదా!

    రేపు చేయు పనికి రూపమివ్వుము నేడు,
    నేడు జేయు పనుల  జూడు మిపుడె

    ఘడియ గడవ యేది గతియించునో గదా!

    మంద వారి మాట!మణుల  మూట !
  ( కబీర్ దాసు గారి దోహ స్పూర్తితో )

అతివ మొగము పైన యాసీడు వద్దురా!!!

లవ్వు లవ్వటంచు రివ్వున గంతులా!
కాదు కూడ దనిన క్రౌర్య మేల ?
అతివ మొగము పైన   యాసీడు వద్దురా !
మంద వారి మాట మణుల మూట !!!


    

  
    

  

మాట,మర్యాద,మన్నన

     మంచి మనసు,మాట,మర్యాద,మన్నన
     మనిషి ఎదుగు దలకు పనికి వచ్చు,
     చెరుపు  చేయు వాడు చేటురా జగతికి  
     మంద వారి మాట మణుల మూట  !
  

మేలు గూర్చు

ఉత్తములగు వారు నుపకారమును సేతు
లుర్వి జనుల కెల్ల నుచిత రీతి
ఉదకమగ్ని గాలి నుర్వియాకస మట్లు
మంద వారి మాట మణుల మూట !

పాప మేల పోవు ? పావనుండెట్లౌను?

  కొంప లంటు పెట్టి కోవలకెళ్ళినా
  గంగ లోనికెళ్ళిదొంగ మునుగ
  పాప మేల పోవు ? పావనుండెట్లౌను?
  మంద వారి మాట మణుల  మూట !

చెడుకు చెరుపు,మంచికి మెరుపు,

బీడులన్ని పచ్చని పోలాలై  పోయి నప్పుడు
మోడు లన్ని మళ్లీ నిండుగా చిగురించి నప్పుడు,
అన్నార్తుల కడుపు లన్ని అన్నం తో నిండి నప్పుడు
నిరుద్యోగుల  కలలన్నీఉపాధితో పండి  నప్పుడు,
నలిగిన   చీకటి బ్రతుకుల్లో చిరు  కాంతులు వెలిగి నప్పుడు,

అధర్మం  సమాధియై ధర్మమే పునాదై నప్పుడు,
అసత్యం ఉరి కంబమెక్కి సత్యానికి ఊరట కలిగి నప్పుడు,
అన్యాయం పై న్యాయం గెలుపును సాధించి నపుడు
చెడుకు చెరుపు,మంచికి మెరుపు,
ఎప్పుడో అప్పుడే విజయ దశిమి
అది ఎప్పుడూ రావాలని
మన అడుగు
ముందుకే పడాలని
అందుకే మనం మారాలని
ఆ దశను నిండుగా కోరుకుందాం
ఈ దశమి పండుగ చేసుకుందాం.!
అందరికి దసరా శుభా కాంక్షలు.

మనను ఏలు కింగు

    మాట తూల బోడు మర్యాద వీడడు
    నీతి దప్పు తప్పు రీతి  లేదు
    మనను ఏలు కింగు  మన్మోహనా సింగు
    మంద వారి  మాట మణుల  మూట !
   

నడ్డి విరుగు

ఆశ ఎక్కు  వైన   అసలుకే మోసమౌ
వడ్డి రాదు తుదకు  నడ్డి విరుగు
కన్నులుండి మురికి  కాల్వలో పడ్డట్లు ,
మంద వారి మాట మంచు మూట !
                                            
సింధు వందు బుట్టె సిరిబాల జాబిల్లి
మనుసు  చిలుక బుట్టు  మంచి, మమత
బుద్ది శుద్ధి గాగ , శుద్దోదనులు గారె,
మంద వారి మాట మంచు మూట !

పరుగులు వచ్చునా

  కంద పద్యబెంత అందంగా జెప్పినా
  భావ లేమి చేత  బౌన్సు గాదె
  పాడు పిచ్చు పైన పరుగులు వచ్చునా
  మంద వారి మాట మణుల  మూట !

మంచి మాట లెపుడు మనబాగుకే గదా !

  
ఉప్పు తక్కు వైన  ఊరేమి మునుగునా
కొంచ మెక్కువైన  పొంచు ముప్పు
మంచి మాట లెపుడు మనబాగుకే గదా ! 
మంద వారి మాట మణుల  మూట.! 
(శ్రీ మంతా సత్య నారాయణ గారి ఆరోగ్య సూత్రాలు వింటున్నప్పుడు వ్రాసినది
ఉప్పు అసలే వద్దంటా రాయన అది తెచ్చే ముప్పును గూర్చి చెబుతూ )

ముత్యాలు రాలునా ?

పొట్ట చేత బట్టి  పొద్దంత కష్టించు 
కూలి వాని గూడు కూల్చనేల
ముష్టి వాని మొట్ట ముత్యాలు రాలునా ?
మంద వారి మాట మణుల  మూట!

సెల్లు చెవిన బెట్టి చేత బైకును బట్టి
సొల్లు మాట లాడి సోలి పడగ
ముప్పదారు పళ్ళు మూడు పళ్ళవ్వవా
మంద వారి మాట మణుల మూట !

తప్పు  తాము జేసి  ఒప్పుగా వాదించు
మూఢ  మతుల వలన ముప్పు పొంచు
అట్టి వారి జట్టు కట్టిన ఫలమేమి ?
మంద వారి మాట మణుల మూట!
                                           
                                        
                                            

పచ్చని చేలలో సైతం

     విలువల వలువూడ దీసి
     నీతిని  గోతిలో పాతి
     న్యాయానికి తారు పూసి
     సత్యానికి శిలువ వేసి
     చట్టాలను సంకెళ్ళను
     సామాన్యుల మెడన చుట్టి
     అదరగొట్టి బెదరగొట్టి
     పసి పిల్లల నోళ్ళు గొట్టి
     ప్రజల కడుపు మాడ గొట్టి
     పచ్చని చేలలో సైతం
     సెజ్జుల కార్చిచ్చు  పెట్టి
     అసత్యాల పునాదిపై
     అక్రమ హార్మ్యాలు గట్టు
     దుష్టుల దాష్ట్యీకానికి
     అంతమెప్పుడో ?
     ఈకుట్రలు కుతంత్రాలు ఆగుటేప్పుడో?
     బలహీనుల గుండె చప్పుడాగి నప్పుడా !
     శ్రమ జీవుల  స్వేదజలం మరిగినప్పుడా ?
    

అ గణితుడు

      నుదుటన  కస్తూరి  తిలకమై  మెరిసిన
         నూత్నమౌ వెలుగులు నూరు సేయు
      వెదురు వేణువు నోటి పేటిలో వీణయై
          వీచిన రాగాలు వేయి చేయు
      అక్షయ మైనట్టి కరుణ కారణ నయన
          వీక్షణ క్షణ ఫలము లక్ష సేయు
      కొనగోట గిరినెత్తి సురనాథు నెదిరించి
           గోపాలకుని లీల కోటి సేయు
         నని భ్రమసి వెలగట్ట నవని తరమె!
         అవని నేలెడు దొరగొల్వ అస్త్రమెద్ది?
         అగణితుని  గణి యింపగా గణితమెద్ది?
         అతులుని తులన జేసెడి  తూకమెద్ది? 
          
     

ఈ ప్రపంచ రూపం .

         కర్షకుడు కలం పడితే  ఆహరమౌతాడు
         శ్రామికుడు కలం పడితే  పరిశ్రమౌతాడు
         సైనికుడు  కలం  పడితే  రక్షకు డౌతాడు
         న్యాయమూర్తి కలం పడితే తీర్పౌతాడు
        డాక్టర్  కలంపడితే  ఆరోగ్యమౌతాడు
        గురువు కలంపడితే  మార్గదర్షౌతాడు 
        కవి కలంపడితే  కావ్యమౌతాడు
        శాస్త్రవేత్త  కలంపడితే రమ్య హర్మ్యమౌతాడు
         ఎందరో మహానుభావుల అనుభవాక్షరాల
         సారమే  ఈనాటి ప్రగతి ,ఈ ప్రపంచ రూపం .
      

మనువు సున్న.

తెలుగు వారి  సంస్కృతిలో  బొట్టు, మంగళసూత్రాలు,మట్టెలు, గాజులు   పూలు ఇత్యాదివన్నీ పుణ్య స్త్రీలకు పవిత్ర మైనవి.
తర తరాల నుండి వీటిని ధరిస్తూ సంప్రదాయాన్ని ఇష్టపూర్వకంగా  గౌరవిస్తూ ఉండడం  అందరికీ  తెలియ నటువంటిది  కాదు
కాని కేవలం  ఇవిమాత్రమే స్త్రీలకు ఆనందాన్ని కలుగజేస్తాయని,  వారి  వ్యక్తిత్వాన్ని పెంపోదిస్తాయని అనుకోవడానికి లేదు
వేదింపులకు వెటకారాలకు  గురి చేసే   అత్త మామలు , చులకనచేసి  గౌరవానికి భంగం  కలిగిస్తూ ఎత్తిపొడుపు మాటలతో
అధికారం చెలాయించే ఆడబిడ్డలు ,మనసు అర్థం చేసుకోలేని, అసలు  మనిషే అర్థం కాని భర్త  ఉంటే  అసలు ఆనందం
ఎక్కడ  ఉంటుంది ?   వ్యక్తికి    ఆదరణ   కరువై , ఆత్మీయత దూరమైతే,  ప్రేమగా చూసికోని, ఎన్నిచదివినా తన మనసు మాత్రం 
చదవని  ఎన్ని తెలిసినా  మమత మాత్రం  తెలియని  భర్త  అయితే  ఇక ఆనందం ఎలా ఉంటుంది ? డబ్బు,దర్పం  మనిషికి కొంత
వరకు సుఖాన్ని ఇవ్వగలవేమో గాని  సంతోషాన్ని మాత్రం   ఇవ్వలేవు  ఎందుకంటే సంతోషం, ఆనందం అనేవి మనస్సులో
జనించేవి అని పెద్దలు చెబుతారు .
                 కుదురుగా దిద్దిన ముదురు కుంకుమ రేఖ
                         బడతుల ప్రణయ సౌభాగ్య రేఖ
                మంగళ ప్రదమైన  మాంగల్య చిహ్నంబు
                         పుణ్యాంగనల ప్రీతి పుస్తె  త్రాడు .
  .              జడనిండ సొంపైన జాజి మల్లెల దండ
                         చెలువంపు గాజులు  చేతినిండ
                  వ్రేళ్ళకు  తోడైన  వెండి మట్టెల  జోడు
                         పాదాల కమరిన పట్ట గొలుసు
                   
                    ఇన్ని యున్నను ఇంతులకింపు గలదె
                     అత్త గయ్యాళి వెటకారి మామ యున్న
                    ఆడు బిడ్దల కవ్వింపు జాడలున్న
                     మనసు జదవని మొగడున్న మనువు సున్న.

సరదాకి చిరు కవిత: వందే వందే మాతరం

సరదాకి చిరు కవిత: వందే వందే మాతరం: " వందే వందే మాతరం బహు సుందరం మన భారతం ''వందే'' జన గణ మన భాషితం జల వన నగ భూషితం రాగ వర్ణ రంజితం సువర్ణ వజ్ర శోభితం '..."

వందే వందే మాతరం

    వందే వందే  మాతరం
    బహు సుందరం మన భారతం ''వందే''
    జన గణ మన  భాషితం
    జల వన నగ భూషితం
    రాగ వర్ణ రంజితం
    సువర్ణ వజ్ర శోభితం  "వందే"
    తలపైన హిమవన్నగము
    తనచుట్టూ సాగర జలము
    ఫాలభాగమున  రమ్య కాశ్మీరం
    పద  పీటమ్మున   కన్యకుమారిం
    తూరుపు దిక్కున అరుణ ప్రదేశం
    పడమటి మెడలో మహ రాష్ట్రీయం  "వందే"
    భిన్న భిన్న జాతులు  విభిన్నమైన రీతులు
    ఎన్నెన్నో భాషలు  వెలుగుల మణిపూసలు
    పలుమతాల తోరణం ధర్మ శాస్త్ర మేళనం
    సత్య శాంతి అహింసలకు చక్కని సమ్మేళనం  "వందే"
    సింహా లేలిన గడ్డ ఇది  గాడిదలకు తల వంచేనా
    పిరికి పందలకు   గుంట నక్కలకు
    పులు లెపుడైనా  బెదిరేనా
    వీరజవానుల ప్రతాపాగ్నిలో
    ఎవరైనా మాడకపోరా
    బొగ్గై  బుగ్గై  మగ్గకపోరా .
    మిగిలిన  ఉరికంబం  ఎక్కగ పోరా .
   ( ఈ కవిత ముంబై తాజ్ హోటల్  పై పాక్ తీవ్రవాదుల దాడి సందర్భంలో వ్రాసినది .ఈదాడిలో
     అసువులు బాసిన అమర వీరులందరికీ అంకితం .)      

సరదాకి చిరు కవిత: పాద మహిమ

సరదాకి చిరు కవిత: పాద మహిమ: " గజ్జెలందియలు ఘల్లు ఘల్లని మ్రోయ నహిమౌలి తాండవం బాడె నెద్ది భువన పావనమైన దివిజ స్రవంతికి ప్రభవ కారణ మౌ చు బరిగె నెద్ది స్వ..."

పాద మహిమ

   గజ్జెలందియలు ఘల్లు ఘల్లని మ్రోయ
   నహిమౌలి తాండవం బాడె  నెద్ది
   భువన పావనమైన దివిజ స్రవంతికి 
   ప్రభవ కారణ మౌ చు   బరిగె నెద్ది
   స్వారాజ్యమును గొన్న వైరోచనుని ద్రొక్కి                   
   పాతాళ భూమికి బంపె నెద్ది 
   పతి శాప వశమున గతి లేక పడియున్న
   చట్రాతి నాతిగా సలిపె నెద్ది
         ఆది లక్ష్మి నిచ్చెడు వేళ నబ్దిరాజు
         కనకపుం బల్లెరమున    కడిగె నెద్ది
         అట్టి నీ పాద పంకజం బమల చరిత
         నా కఠిన దేహమును  దాకి నవసి యుండు.  
        
    (  చిలకమర్తి  గారి  గయోపాఖ్యానము  లోనిది )

  

తీర్పు.

     జగన్ ఓదార్పు
     అధిష్టానం ఓర్పు
     ప్రసారాల కూర్పు 
     స్వపక్షాల నేర్పు
     విపక్షాల వార్పు
     ప్రజల బతుకుల్లో లేనేలేదు మార్పు
     ఎన్నికల్లోనే ఇస్తారు తగిన తీర్పు.
  

ఇవే కదా

కోడలిపై  కన్నేసిన మామ
అత్తను ఆశించిన అల్లుడు
భార్యను నరికిన భర్త
తండ్రిని చంపిన తనయుడు
బిడ్డను అమ్మిన అమ్మ
తనయను చెరిచిన తండ్రి
ఇవి కావా ఆత్మీయ బంధాలకు పడ్డ చిల్లులు
ఇవే కదా మానవీయతకు గుచ్చుకొంటున్న ముల్లులు  

నేటి నాయకుడు

  తొలుత  నమస్కారం
  ఆపై అధికారం
  అన్నిటికీ బేరం
  ప్రజల కంట్లో కారం       

తెలంగాణం

తెలుగు గానం
తమిళ రాగం
కన్నడ తాళం
ఇటలీ మేడం
ఇచ్చేనా తెలంగాణం 

effect of drinking

       డైలీ పావు రమ్ము
       పర్సుకు క్షవరమ్ము
       లంగ్స్ కు    విషమ్ము
       లైఫే   నరకమ్ము
       ఇది  ముమ్మాటికి నిజమ్ము