సరదాకి చిరు కవిత

Friday, June 24, 2011

వన్య జీవుల రక్షింప వలెనటంచు
వ్యాఘ్ర సింహాల జింకల వర్ణ పటము
లడవి ముంగిట బెట్టిగ నావు యొకటి
వ్యాఘ్ర మాఁకొని మేసెను పచ్చగడ్డి!

(శంకరాభరణం బ్లాగు లో21-06-2011 నాటి సమస్యా పూరణ-370లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు. )

తప్పు పనుల జేయ తగదని వారించి
యొప్పు పనుల గొప్ప విప్పి జెప్పి
ముప్పు దెచ్చు నట్టి మూఢ నమ్మకముల
కప్పి,చెప్ప నదియె కవిత యగును !

(శంకరాభరణం బ్లాగు లో20-06-2011 నాటి సమస్యా పూరణ-369లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు. )

ఎంతగ సంపదనున్న,శ

మంతకమణి బోలునొక్కమణియేదైనన్

చెంతన గలిగిన, తొలగదె

చింతా! మణికంటెమంఛి చెలువలుగలరే

(శంకరాభరణం బ్లాగు లో18-06-2011 నాటి సమస్యా పూరణ-367లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు. )

చిత్తరువు గీసి, కోమలి
చిత్తమ్మును దోచెనేమొ,చిన్నది ప్రేమో
న్మత్తునబడె, నేమున్నదొ
నుత్తరమున, భాను బింబ ముదయంబాయెన్ !

(శంకరాభరణం బ్లాగు లో18-06-2011 చమత్కార పద్యాలు -79 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు. )

నీతి యన్నది గనరాదు నేత లందు,
ప్రీతి లేదులే పేదకు భీతి దప్ప
ప్రజలు గోరున దేమిటో ప్రభుత గనదు

భారతీయత మనకిదే భారమయ్యె !

(శంకరాభరణం బ్లాగు లో10-06-2011 నాటి సమస్యా పూరణ-359లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు. )

వద్దు, పెళ్లివద్దు ,వల్లకాడునవద్దు
తగిన చోటు గాదు తమకు ననిన,
భూతనాథుడుండు భూమియదేనన

వల్లకాడులో వివాహ మయ్యె!!

(శంకరాభరణం బ్లాగు లో09-06-2011 నాటి సమస్యా పూరణ-358లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు. )

రామ పత్నినాశించిన రావణుండు
రాము తోపోరి జచ్చెను రణమునందు !!
కోమలమ్మైన మానిని గోరి,మదన

చీమ కుట్టగ జచ్చెను సింహ బలుడు!!!

(శంకరాభరణం బ్లాగు లో08-06-2011 నాటి సమస్యా పూరణ-357లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు. )