గొడ్డుటావుపాలు కుండనిండె!!!

గొడ్డుటావుపాలు కుండనిండెననుచు
యడ్డగోలు మాటలాడతగునె?
గడ్డిమేయమఱిగి గద్దెనెక్కిన గొడ్డు
పాలనిచ్చుననుట పాడియౌనె?

(శంకరాభరణం  బ్లాగు లో07-06-2011 నాటి  సమస్యా పూరణ-356లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు. )    

 

భామాకుచమండలంబు భస్మం బాయెన్!

తామర గర్భుడు,కృష్ణుని 

 నామంబునబుట్ట,వానినస్యముజేయన్,
మామయె బంపిన పూతన

భామాకుచమండలంబు భస్మం బాయెన్! 

(శంకరాభరణం  బ్లాగు లో08-06-2011 చమత్కార పద్యాలు -69     లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు. )    

 

కల్ల లాడువారె కవులు గాదె!

మేఘుడెన్నడైన మేసేజులిచ్చునా!
రాయికరుగునెట్లు రాగమునకు?
పూలునోళ్ళువిప్పి జాలిగాపలుకునా !

కల్ల లాడువారె కవులు గాదె!

మేసేజు = message=సందేశం

(శంకరాభరణం  బ్లాగు లో06-06-2011 నాటి  సమస్యా పూరణ-355లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు. )    

 

తమ్ముల గాంచి కోపమున దామరసేక్షణ తిట్టె నయ్యెడన్!

మాతృ మూర్తుల దినోత్సవ సందర్భంగా నొక తనయ తన తమ్ములతో అమ్మను సత్కరించు కొరకు ఒకరత్నాల హారాన్ని తెమ్మని, తాను గులాబిహారాన్ని తెచ్చి వేయు సమయంలో,

తమ్ములు  వేసినామనిరి తల్లికి ,రత్నపు హారమొక్కటిన్,
యమ్మకు బ్రీతి గూర్చగను, యన్నులమిన్న గులాబి పూలహా
రమ్మును ,వేయబోయి గనె, రత్నపు హారము లేకబోవుటన్,

తమ్ముల గాంచి కోపమున దామరసేక్షణ తిట్టె నయ్యెడన్!

(శంకరాభరణం  బ్లాగు లో08-05-2011 నాటి  సమస్యా పూరణ-333లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు. )    

 

 

మగువను; బెండ్లాడె మగువ మరులుదయించన్!!!

సెగ దాకెనేమొ రాగపు,
నగు మోమునుజూచెనేమొ,నారిని మెచ్చెన్,
మొగమాట పడక నడిగెను

మగువను; బెండ్లాడె మగువ మరులుదయించన్!!! 

(శంకరాభరణం  బ్లాగు లో02-06-2011 నాటి  సమస్యా పూరణ-351లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు. )    

 

మూడు కనుల వేల్పు, ముర హరుండు !

ధర్మమాచరించి దానంబుజేయుచు
సత్య పథమునందు సాగు వారి
వాక్కులందునెపుడు వసియింతు మందురు,

మూడు కనుల వేల్పు, ముర హరుండు ! 

(శంకరాభరణం  బ్లాగు లో31-05-2011 నాటి  సమస్యా పూరణ-348లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు. )    

 

గొప్ప వారికుండు గొంచె బుద్ధి !!

(మాజీ ఆంధ్ర ప్రదేశ్ గవర్నర్ నారాయణ దత్ తివారి ఉదంతము దృష్టిలో బెట్టికొని)

రాజ్య పాల కుండు రాసలీలల దేలి
రాజ భవను విడిచె రచ్చగాగ
తప్పు డైన పనులు ముప్పు దెచ్చెను గదా

గొప్ప వారికుండు గొంచె బుద్ధి !!

ధర్మసూను డతను ధర్మమ్మునేవీడి
ద్రోణుని హత మార్చ దోషియయ్యె
నంత రాత్మ జంపి వింతగా మాట్లాడె

గొప్ప వారికుండు గొంచె బుద్ధి!!!.  

(శంకరాభరణం  బ్లాగు లో20-05-2011 నాటి  సమస్యా పూరణ-343లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు. )