సర్వ మెరుగు వాడు సంసారమున లేడు !!!

తెలియనివిషయమ్ము తెలుసుకొనడమొప్పు
కూడ తెలిసి చెప్ప కునికి తప్పు
సర్వ మెరుగు  వాడు సంసారమున లేడు
మంద వారి మాట మణుల మూట !!!

పుట్టినట్టిజీవి !!!

ఏది శాశ్వతమ్ము యేది కాదనియెడు
విషయ మెరుగు నట్టి విభు వొకండె
పుట్టినట్టిజీవి గిట్టుటే సత్యంబు
మంద వారి మాట మణుల మూట !!!

శ్రీ రామ నవమి శుభాకాంక్షలు !!!

 

 


శివ ధనువును రఘురాముడు
నవలీలగ   నెత్తి ద్రుంచి నవనిజ సీతన్
ధ్రువ కీర్తిన పెండ్లాడెను
రవిచంద్రుల సాక్షిగాను రమణీయముగా !!!

రామ రామ యనిన!!!

రామ రామ యనిన దోమలే పోలేవు
పాప మెటులబోవు భజన వలన
దక్కు విజయ  మెపుడు ధర్మాచరణ చేత
మంద వారిమాట మణుల మూట !!!

మాట మంత్రమౌను!!!

మాట మంత్రమౌను మహిలోన పరికించ
మదిని దోచు గాదె మంచి మాట
కటువు మాట లాడ  కార్యముల్ జెడిపోవు
మంద వారి మాట మణుల మూట !!!

తెలిసియుండ వలెను తెలివిగా భాషింప!!!

తెలిసియుండ వలెను  తెలివిగా భాషింప
లేనియెడల చాలు మౌనవ్రతము
రెంటిలోన నొకటి ఒంటబట్టిన మేలు 
మంద వారి మాట మణుల మూట !!!

జయ నామ సంవత్సర శుభాకాంక్షలు !!!

నోరు మంచిదైన యూరు మంచిదటంచు
యెరిగి యున్న నుర్వి నేలగలడు
పొంచి యుండు "జయ"ము మంచిమాట లయందె
మంద వారి మాట మణుల మూట !!!

అందరకూ జయ నామ సంవత్సర శుభాకాంక్షలు !!!