సరదాకి చిరు కవిత: March 2013

Tuesday, March 19, 2013

వలదు వరము లీయ చెలగిసంతోషాన
కూయ బోకు మెపుడు కోపమందు
నిర్ణయములుతగవు నిండునిరాశలో
మంద వారి మాట మణుల మూట !!!

చెట్టు కొమ్మ విరుగ చిగురించు తరుశాఖ
కలత జెందనేల కష్టములకు
రాత్రి వెళ్ళి పోవు రవిమళ్ళి ప్రభవించు
మంద వారిమాట మణుల మూట !!!

సమయమెల్ల నెపుడు సద్వినియోగమ్ము

చేయువారిచెంత జేరు జయము

అబ్బుచుండు మంచి యలవాట్లు వారికే

మంద వారి మాట మణుల మూట !!!

సాధ్య పడదనుచిరు సంశయంబునువీడు
భయము తొలిగి నాత్మ బలము పెరుగు
విజయ పథమునకదె నిజమైన తొలిమెట్టు
మందవారి మాట మణుల మూట !!!

అర్థ శాస్త్రమెల్ల ఆపోశనంబట్టి
కూడు బెట్ట లేని కుటిల మతులు
రాజులైన ప్రజకు రాళ్ళ సమానమే
మంద వారి మాట మణుల మూట !!!

మనిషి శుభ్రమౌను మలినముల్ తొలుగును
నీటి లోన మునుగ నిక్కముగను
మనసు జ్ఞానమందు మునుగంగ శుభ్రమౌ !!
మంద వారిమాట మణుల మూట!!!

కాల మాగ బోదు,కాలానుగుణముగా
కదులు వారికెపుడు గలుగు శుభము
కదల లేని వారి కథమారిపోవులే
మంద వారి మాట మణుల మూట !!!

పానకమున మునిగి పలుమార్లు తేలినా
యెఱుగబోదు తీపినెపుడు "గరిట"
జ్ఞాను లెదుట తిరుగ జ్ఞానౌనె మూర్ఖుడు
మంద వారిమాట మణుల మూట !!!

హద్దులు జెప్పని జనకుడు
యుద్డంబునుజేయలేని యోధుడు భార్యన్
ముద్దుగ జూడని మగడును
బుద్దులు నేర్పని గురుండు పూజ్యులె దలపన్ !!!