బల రాముడు లంక జేర వారధిగట్టెన్!!!

జలనిధి దాటగ, వానర
బలశాలురు తోడుగాగ, భాసుర లీలన్
ఖలులన్ ద్రుంచగ సద్గుణ
బల రాముడు, లంక జేర వారధిగట్టెన్!!!

శంకరాభరణం  బ్లాగులో 16-09-2013 నాటి  సమస్యా పూరణ-   1176లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు 

నాథ! “ఓం నమోనారాయణయ”యనకు!!!

హరిని దలచుచు సతతమ్ము తిరుగు మౌని
దైత్య నాథుడౌ కశపుని దరికివచ్చు
నారదుని గని గలడు నా నాథుడు ముని
నాథ! “ఓం నమోనారాయణయ”యనకు!!!

శంకరాభరణం  బ్లాగులో 07-09-2013 నాటి  సమస్యా పూరణ-   1167లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు

పిల్లి !!!

పిల్లికి బిక్షమ్ము బెట్టనేరని వాడు
....పిలిచి సంతర్పణ పెట్ట గలడె ,
పిల్లికి భయపడు పిరికి వాడెపుడైన
....పులిముందు తలయెత్తి నిలువ గలడె
పిల్లి మార్చిన యట్లు పిల్లల పలుచోట్ల
....మార్చిసమస్యల తీర్చ గలడె
పిల్లి కంటబడిన వల్లుగాలేదంటు
....యింటిలోనె బ్రతుకు నీడ్వ గలడె
పిల్లి స్వభావమ్ము పిల్లి ప్రభావమ్ము
....యింటింట యూరుర కంట బడదె

"పిల్లి ఎలుకకు సాక్ష్యమ్ము" "పిల్లికి చెల
గాటమెలుకకు ప్రాణ సంకటము" గాదె
"గోడమీదిపిల్లి" మనకు గోపి . పిల్లి
తెలుగు భాషలోనిటుల జాతీయమయ్యె !!!

పాపాత్ములె పూజ్యులగు నుపాధ్యాయులిలన్!!!

కోపోద్రేకుల పాలిటి
పాపాత్ములె , పూజ్యులగు నుపాధ్యాయులిలన్
దీపశిఖలు, విజ్ఞానపు
రూపాలను జూపు సద్గురువులకు ప్రణతుల్ !!!

(శంకరాభరణం  బ్లాగులో 05-09-2013 నాటి  సమస్యా పూరణ-   1165లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)

డా. సర్వేపల్లి రాధాకృష్ణన్.

 


గురువుగా విజ్ఞాన తరువుగా విశ్వాన
....ఘనకీర్తి బొందిన ఘనుడెవండు ?
ప్రాక్పశ్చిమంబుల  పండితారాధ్యుడై
....విభవమ్ము వడసిన విభుడెవండు ?
రాయబారములందు రాజకీయములందు
....రాణించి మెరిసిన రత్నమెవరు ?
భారత రత్నయై పరతత్వ వేత్తయై
....ధర్మ కోవిదు డైన దక్షుడెవరు ?

పదవులకు వన్నె దెచ్చిన ప్రభువెవండు ?
సత్య సారమ్ము నెరిగిన సాధువెవరు ?
రాష్ట్రపతియెసర్వేపల్లి రాధ కృష్ణ
పండితుడతండు విజ్ఞాన మండితుండు !!!

శూలితనయ గంగ సోదరి యుమ!!!

పండితులకె దెలియు వరసలు బంధాలు
తెలిపి రిటుల వరుస తీరుమనకు
విశ్వ కారకుడగు విష్ణు మూర్తికి బావ
శూలి, తనయ గంగ, సోదరి యుమ!!!

(శంకరాభరణం  బ్లాగులో 03-09-2013 నాటి  సమస్యా పూరణ-   1163లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)

హంతకునకు; వరమొసంముగె నలరజగము !!!

ధర్మ సంస్థాప నార్ధమై ధరను కృష్ణు
నిగనవతరించితి విజయ, నిజమువినుము
పాపమంటదు బుణ్యంబు వచ్చుదుష్ట
హంతకునకు; వరమొసంముగె నలరజగము !!!

(శంకరాభరణం  బ్లాగులో 02-09-2013 నాటి  సమస్యా పూరణ-   1162లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)

విజయ దశమి శుభాకాంక్షలు.

 కవి మిత్రులకు ,పాఠకమహాశయులకు విజయ దశమి శుభాకాంక్షలు.

జాతి పిత!!!

  పోరుబందరునందుబొడిచిన సూర్యుండు
    ....నస్తమించగ జేసె నాంగ్ల ప్రభను,
    ఊతకర్రను బట్టి జాతిని కదిలించి
    ....చైతన్య స్పూర్తిని జ్వలన జేసె,
    సత్యాగ్రహమ్మునే సాధనంబుగ జేసి
    ....సామ్రాజ్య వాదుల సాగనంపె,
    కరవాలమునులేక పరపాలనంబుకు
    ....చరమ గీతము పాడి చరితకెక్కె,

    హింస హేయమన్న పరమ హంస గాంధి,
    నీతి నియమాల దప్పని నేత గాంధి,
    స్పూర్తి నొసగిన కారుణ్య మూర్తి గాంధి,
    జాతి పిత గాంధి ధార్మిక  గీత గాంధి !!!

మాటలాడు చోట మౌన వ్రతము!!!

అనుచితమగు చోట నధిక ప్రసంగమ్ము
మాటలాడు చోట మౌన వ్రతము
పాడిగాదు రెండు ఫలితంబు నీయవు
మంద వారి మాట మణులమూట !!!

చేయ దగిన పనిని చేయకునికి !!!

కూడనట్టి  పనిని కుదురుగా జేయుచు
చేయ దగిన  పనిని చేయకునికి 
తరచి చూడ రెండు తప్పులే యగుగాదె !
మంద వారి మాట మణుల మూట!!!

వెధవ విబుధుడౌనె వేషంబుమార్చిన!!!

గళ్ళ జీనువేసి కళ్ళెంబు తగిలించ
ఖరము మారిపోయి తురగమగునె
వెధవ విబుధుడౌనె వేషంబుమార్చిన
మంద వారి మాట మణుల మూట!!!

పాదమ్ములులేని నరుడు పరుగిడజొచ్చెన్ !!!

వేదాద్యయనము, శ్రీహరి
పాదార్చన, గురువుసేవ వరహృదయమునన్
పాదుకొనజేయ దుర్బల
పాదమ్ములులేని నరుడు పరుగిడజొచ్చెన్ !!!

(శంకరాభరణం  బ్లాగులో 01-09-2013 నాటి  సమస్యా పూరణ-   1161లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)      

కొడుకు పుట్టె సన్యాసికి గురువు కృపను !!!

హరిని నిందించు రాజునకవని మెచ్చు
కొడుకు పుట్టె ;సన్యాసికి గురువు కృపను
భక్తిమార్గమ్ము జూపించు శక్తిబుట్టు,
పుచ్చునేతల కెపుడుసద్బుద్ధి పుట్టు?

(శంకరాభరణం  బ్లాగులో 31-08-2013 నాటి  సమస్యా పూరణ-   1160లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)      

“తెలుఁగు పద్యము”!!!

 “తెలుఁగు పద్యము”
గురువుల లఘువుల కుదురుగా కూర్చిన
.....పలు గణమ్ముల మాల పద్యమోయి,
ప్రాసలు యతులను పరిమితుల్ గల్గిన
.....విద్యయే రసరమ్య పద్య మోయి,
శార్దూల మత్తేభ చంపకోత్పలముల
..... పలువృత్తములమాల  పద్యమోయి,
సంధి సమాసాలు సహజోపమానాలు
.....ప్రాణంబు లైనట్టి పద్యమోయి,

పద్యమే తెల్గు భాషకు ప్రాణ మోయి,
పద్యమే తెల్గు కవులసౌభాగ్య మోయి,
 పద్యమేనాటకములకు  హృద్య మోయి,
పద్యమే వాణి కిష్ట నైవేద్య మోయి!!!

 (శంకరాభరణం  బ్లాగులో 31-08-2013 నాటి  “తెలుఁగు పద్యము”!!!   450 .తోటి మిత్రుల రచనలను బ్లాగులో వీక్షించవచ్చు

వెలుతురున్న చోట నిలుచునే తిమిరమ్ము?

తపన యున్న,యింటి తలుపుతట్టుగెలుపు

ఓటమితన మొగము చాటు వేయు

వెలుతురున్న చోట నిలుచునే తిమిరమ్ము?

మంద వారి మాట మణుల మూట!!!

వొడ్డాణమలంకరించెనువిదశిరమ్మున్!!!

రెడ్డీలయింతి   పంక్తిన
లడ్డూలనుచేతబట్టి లావణ్యమునన్
వడ్డనజేయగ తగిలిన
వొడ్డాణమలంకరించెనువిదశిరమ్మున్!!!

  (శంకరాభరణం 28 -08-2013 నాటి  సమస్యా పూరణ-   1157లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)

భాగ్య నగరమ్ము హైదరాబాదు కాదు !!!

గతప్రాభవమునకు ప్రతిరూపమైనట్టి
....పలుకట్టడమ్ముల ప్రభలుతగ్గె
నిజమైన ప్రేమకునిలువెత్తుసాక్ష్యమౌ
....భాగ్యనగర సీమ పరువు తరిగె
విజ్ఞానగంధమ్మువిశ్వానికందించు
....విద్యాలయమ్ములు వికలమయ్యె
వాసిగాంచినమేటి  మూసీసుజలధార
....మురికి కాల్వగమారి పరుగు లాపె
భిన్న జాతుల మద్య బిగిసిన బంధమ్ము
....లన్నదమ్ములమద్య నతుకులూడె

తెలుగు నగరాన నాంగ్లమ్ము వెలుగు చుండె
బలము గలిగిన వారికే ఫలము దక్కె
మేటి నగరాల కెల్లను సాటి, నాటి
భాగ్య నగరమ్ము హైదరాబాదు కాదు !!! 


 (శంకరాభరణం  బ్లాగులో  29-08-2013 నాటి  సమస్యా పూరణ-   1158 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)    

మురళీగానమ్ము మరణమును గలిగించున్!!!

 నరపాలా! రూపాయిని
పరికింపుము,లేనియెడల వాణిజ్యమునన్
సరళీ కృత రాగజనిత
మురళీగానమ్ము మరణమును గలిగించున్!!!


(శంకరాభరణం  బ్లాగులో 24-08-2013 నాటి  సమస్యా పూరణ-   1153లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)      

తీర్థ యాత్రల వలన వర్ధిల్లు నఘము!!

తల్లి దండ్రులక్షేమమ్ముదలపలేక
పలుకులందున సత్యమ్ము నిలపలేక
ప్రేమతత్వమ్ముశూన్యమై  వెళ్ళు చుండు
తీర్థ యాత్రల వలన వర్ధిల్లు నఘము!!

(శంకరాభరణం  బ్లాగులో 23-08-2013 నాటి  సమస్యా పూరణ-   1152 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)     

బకమున్వడి మ్రింగుచున్నబల్లింగనుమా!!!

శుకమునకు పికమునకు మ
క్షికమునకు మశకమునకును జెప్పెద నేనే
శకునమ్మన,చూపులతో
బకమున్వడి మ్రింగుచున్నబల్లింగనుమా!!!

(శంకరాభరణం  బ్లాగులో 25-08-2013 నాటి  సమస్యా పూరణ-   1154 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)    

సానీ నీసాటి గలరె సాధ్వులలోనన్!!!

మ్రానుసమానుని కవికుల
భానునిగాదీర్చినట్టి వాణీ! పదగీ
ర్వాణీ!! పంకజభవు దొర
సానీ!!! నీసాటి గలరె సాధ్వులలోనన్!!! (1)

ఆనాటికినీనాటికి
కోనలలోబ్రతుకుకోయ కూనలకెల్లన్
ప్రాణముపోసెడు కిన్నెర
సానీ! నీ సాటి గలరె సాధ్వుల లోనన్!!!  (2)


 (శంకరాభరణం  బ్లాగులో 21-08-2013 నాటి  సమస్యా పూరణ-   1150 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు )

యమమహిష ఘంటికానాదమతి హితమ్ము!!!

ధరలు, దౌష్ట్యమ్ము, నవినీతి పెరిగిపోయి
జీవనముఘోరనరక మై చింతహెచ్చి
దినదినముచచ్చుజీవుని దిగులుదీర్చు
యమమహిష ఘంటికానాదమతి హితమ్ము!!! 

 (శంకరాభరణం  బ్లాగులో 20-08-2013 నాటి  సమస్యా పూరణ-   1149 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)    

వలదు వలదనుకొన్నసంప్రాప్తమగును!!!

కావలయునన్న పుట్టునే కరుణ రసము
పోవలయునన్న పోవునే పొగరు గుణము
కో పతాపాలు  మదిలోన  కొలువు దీర
వలదు వలదనుకొన్నసంప్రాప్తమగును!!! 

 (శంకరాభరణం  బ్లాగులో 19-08-2013 నాటి  సమస్యా పూరణ-   1148 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)   

భీమసేనుడు దేవకీ ప్రియసుతుండు!!!

భీమసేనుడు, దేవకీ ప్రియసుతుండు
జూచుచుండగ గదబూని చాచికొట్టి
మడుగులోనున్న కురురాజు తొడలపైన
పూర్తి జేసెను రణమును పుడమి మెచ్చ!!!


 (శంకరాభరణం  బ్లాగులో 18-08-2013 నాటి  సమస్యా పూరణ-   1147 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)  

పుస్త కమ్ముఁ జదువువాఁడు ఖలుఁడు సుమ్ము!!!

ప్రజల మస్తకముల పఠియింప వలెనన్న
చదువుటొప్పు సకలశాస్త్రములను.
రహిని త్రుంచి మత్సరములబెంచెడుపుస్త
కమ్ముఁ జదువువాఁడు ఖలుఁడు సుమ్ము!!!

 
(శంకరాభరణం  బ్లాగులో16-08-2013 నాటి  సమస్యా పూరణ-   1145 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)   

బుద్ధి శుద్ధి జేయు బుధుని మందు!!!

శంకరా భరణపు సంజీవినై యొప్పు
రామ జోగి మందు: ప్రాణ హరము
గాని, మాన హాని గాని లేనట్టిదౌ
బుద్ధి శుద్ధి జేయు బుధుని మందు!!!

(శంకరాభరణం  బ్లాగులో 09-08-2013 నాటి  సమస్యా పూరణ-   1138 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు )

త్రాగి పాడెనంట త్యాగరాజు!!!

శ్రుతుల సారమెల్ల కృతులలో బంధించి
రచన జేసి భక్తి రసములూర
రాగ తాళమిళితరామనామరసము
త్రాగి పాడెనంట త్యాగరాజు!!!


 (శంకరాభరణం  బ్లాగులో 08-08-2013 నాటి  సమస్యా పూరణ-   1137 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు )

పాండవులు దుష్ట చిత్తులై భంగ పడిరి!!!

ధర్మ నిరతులు ధరనేల తగిన వారు
పాండవులు: దుష్ట చిత్తులై భంగ పడిరి
కౌరవులుపెక్కు మారులు ధారుణముగ
ధర్మ సుతునకే చివరకు ధరణి దక్కె!!!

 (శంకరాభరణం  బ్లాగులో07-08-2013 నాటి  సమస్యా పూరణ-   1136లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)  

వావి వరుసలఁ జూడనివా రనఘులు!!!

రాజ రాజనరేంద్రుని రాణియైన
రమణిచిత్రాంగికోరగ రాచకొడుకు
వావి వరుసలఁ జూడనివా రనఘులు
కారుకారనివారించెగౌరవముగ!!!

 (శంకరాభరణం  బ్లాగులో05-08-2013 నాటి  సమస్యా పూరణ-   1134లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు) 

సంపాదన లేని మగని సాధ్వి నుతించెన్!!!

పెంపువహించినమునియే
సంపదలహరించిజేయ సత్యపరీక్షన్
కంపమునొందక పిడికెడు
సంపాదన లేని మగని సాధ్వి నుతించెన్!!!
(సాధ్వి =చంద్రమతి)

కొంపను సంసారపుచిరు
గంపను నడుపగ సరి పడు కష్టపు ఫలమే
యింపనిదలచు నధర్మపు
సంపాదనలేనిమగని సాధ్వి నుతించెన్!!! 

(శంకరాభరణం  బ్లాగులో03-08-2013 నాటి  సమస్యా పూరణ-   1132 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)  

మోఁకాలికిబోడిగుండు ముడివెట్టఁ దగున్!!!

శ్రీకరుడౌ యదు సింహుని
సూకరమనుకొని కిరాతశూరుడు గూల్చన్
రోకలియే కారణమట
మోఁకాలికిబోడిగుండు ముడివెట్టఁ దగున్!!! 

ఏకారణముననైనప
రాకున నమెరికనొబామ రాగముమారన్
వ్యాకులమౌ విపణివిలువ
మోకాలికి బోడిగుండు ముడివెట్ట దగున్!!!

(శంకరాభరణం  బ్లాగులో02-08-2013 నాటి  సమస్యా పూరణ-   1131 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు) 

కౌగిలిమరణమ్మునొసగుగదసరసులకున్!!!

భోగాలకుబానిసలై
చేగూడని పనులుజేయ చేదౌ బ్రతుకే
రాగూడని రోగపుబిగి
కౌగిలిమరణమ్మునొసగుగదసరసులకున్!

(శంకరాభరణం  బ్లాగులో  01-08-2013 నాటి  సమస్యా పూరణ-   1130 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)
  

మనము శాంతించునెన్నొసమస్యలున్న!!!

వెలుగువచ్చిన చీకటి తొలగునట్లు
జ్ఞాన మార్జింప నజ్ఞానమంతరించు
బుద్దిశుద్దమౌ సత్యమ్ము బోధపడును
మనము శాంతించునెన్నొసమస్యలున్న!!! 

(శంకరాభరణం  బ్లాగులో  31-07-2013 నాటి  సమస్యా పూరణ-   1129 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు) 

లలిత కళాభిమానము హలాహల సన్నిభ మెల్లవారికిన్!!!

పలుకులరాణి సత్కళలవాణికి మోదము గూర్చనట్టిదౌ
జలనిధిపైననూగుజలజాయత నేత్రునికిచ్చగాని, లో
కులకురసానుభూతులను గూర్చగలేని వికార పూరమౌ
లలిత కళాభిమానము హలాహల సన్నిభ మెల్లవారికిన్!!!
.
(శంకరాభరణం  బ్లాగులో 30-07-2013 నాటి  సమస్యా పూరణ-   1128లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)

పండగ నాడేలనాకు పాత మగడనెన్!!!

రెండుండ వాహనంబులు
నిండాపదహారురాని నీపుత్రుండౌ
పండరి కేలా క్రొత్తది
పండగ నాడేలనాకు పాత? మగడనెన్!!! 

(శంకరాభరణం  బ్లాగులో  29-07-2013 నాటి  సమస్యా పూరణ-   1127 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు) 

కూతురె తల్లియై జనకు గూరిమి నక్కున జేర్చి పాలిడెన్!!!

‘ఆతడు తండ్రి యామెకట యాతని కర్మఫలమ్మదేమిటో
యాతన జెందసాగితను నాకలి దాహమటంచు దీనుడై
చేతులనెత్తి దీర్చుమని చెయగ సంజ్ఙలుజైలులోపలన్
కూతురె తల్లియై జనకు గూరిమి నక్కున జేర్చి పాలిడెన్!!!

(ఎప్పుడోశ్రీగుమ్మడివెంకటేశ్వర్రావుగారుతనరష్యాపర్యటనజ్ఙాపకాలను ఒకపత్రికలో వివరిస్తూ అక్కడ తాను ఒక చిత్రాన్ని చూసి చలించి పోయినట్లు వ్రాసారు " ఆ చిత్రంలో జైలులో ఉన్న తండ్రిని సందర్శిస్తూ అతని దీనస్థితికి చలించి తన స్తన్యమిచ్చి దాహాన్ని తీర్చుచున్న కూతురి చిత్రమట అది " ఆ సంఘటన ఈ పూరణకు ప్రేరణ.)

(శంకరాభరణం  బ్లాగులో  28-07-2013 నాటి  సమస్యా పూరణ-   1126లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు) 

శరమున్ గని జింకపిల్ల సంతసమందెన్ !!!

పరువమునందతి సహజము
మరుతాపము ప్రాణికోటి మనుగడ కెల్లన్
హరిణపు ప్రణయపు  తొలివిరి
శరమున్ గని జింకపిల్ల సంతసమందెన్ !!!

(శంకరాభరణం  బ్లాగులో  09-07-2013 నాటి  సమస్యా పూరణ-   1107లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)
 

పెండ్ల మయ్యెనుబార్వతివిష్ణువునకు!!!

భువనమోహనునకు ఫణి భూషణునకు
పరమ శివునకు పరితాపహరునకు తగు
పెండ్ల మయ్యెనుబార్వతి:విష్ణువునకు
మునిజనసురగణములకు మోదమలర!!!

మండు నేత్రము ఫాలమందుండు దొరకు
వెండి కొండపై కొలువుండు దండి దొరకు
పెండ్ల మయ్యెను బార్వతి :విష్ణువునకు
సకల జనులకు మోదమౌ సరళి నదియె !!!

(శంకరాభరణం  బ్లాగులో  08-07-2013 నాటి  సమస్యా పూరణ-   1106లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)

వినాయక చతుర్థి పర్వదిన శుభాకాంక్షలు!!!

బ్లాగు వీక్షకులకు, కవిపండిత మిత్రులందఱికిని వినాయక చతుర్థి పర్వదిన శుభాకాంక్షలు.

వందన మిదుగో శుభకర
వందనమందారమాల వరగుణ శీలా
వందనమిదె సురసేవిత
వందన శతములు గణేశ వైరివినాశా !!!

తేలును ముద్దులాడి చెలి తియ్యగ నవ్వును పండువెన్నలన్ !!!

లీలగ జెప్పినాడ మన లీలల నన్నిటి తల్లిదండ్రికిన్
కాలపుతీరుమారెగద కాదనలేరిక పెళ్లిచేయగన్
చాలనె చాటుమాటు సరసాలు, వివాహపుసంబరాలలో
తేలును ముద్దులాడి చెలి తియ్యగ నవ్వును పండువెన్నలన్ !!!

  (శంకరాభరణం  బ్లాగులో  07-07-2013 నాటి  సమస్యా పూరణ-   1105 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)

సౌహార్దముఁ జూపువాఁడె శత్రు వనఁదగున్!!!

ఊహా సుందరివీవని
స్నేహమ్మును జేయుమనుచు చెడుయూహలతో
మోహావేశమున తగని
సౌహార్దముఁ జూపువాఁడె శత్రు వనఁదగున్!!!
 (శంకరాభరణం  బ్లాగులో  06-07-2013 నాటి  సమస్యా పూరణ-   1104 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)

భరతుని జంపె రాఘవుడు భామినికై సురకోటి మెచ్చగన్ !!!

పొరపడి నాగ్రహించి తగు పోరునుజేయగ నెంచి లేచు సో
దరునికి జెప్పె కూడదని ,తారకరాముడనుగ్రహించె నా
భరతుని ; జంపె రాఘవుడు భామినికై సురకోటి మెచ్చగన్
పరమపవిత్ర జానకిని బాధల నెట్టిన  పాపి రావణున్ !!

 (శంకరాభరణం  బ్లాగులో  05-07-2013 నాటి  సమస్యా పూరణ-   1103 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)

బాట వీడి నడచు వాడె జ్ఞాని !!!

స్వార్థచింతవీడిసంఘపుమేల్గోరి
సేవజేయువాడె దైవసముడు
నీతినియమములకు నిలబడి యవినీతి
బాట వీడి నడచు వాడె జ్ఞాని !!!
(శంకరాభరణం  బ్లాగులో  04-07-2013 నాటి  సమస్యా పూరణ-   1102 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు )

పురుషుడు గర్భమ్ము దాల్చె బుణ్య ఫలముగన్ !!!

వరమో, కలికాలపు కల
వరమో,తెలియంగ వశమె వార్తగ వచ్చెన్
కరిహెల్జరనెడు జర్మను
పురుషుడు గర్భమ్ము దాల్చె బుణ్య ఫలముగన్ !!!
(శంకరాభరణం  బ్లాగులో  03-07-2013 నాటి  సమస్యా పూరణ-   1101 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు )

మధువు పైన వ్రాలు మక్షికమ్ముల తీరు !!!

వదలకుండు నట్టి మధుమేహ మొకటున్న
వ్యాధులన్ని జేరు వరసబెట్టి
మధువు పైన వ్రాలు మక్షికమ్ముల తీరు
మంద వారి మాట మణుల మూట !!!

నువిదకు నుంగరమె మేటి యొడ్డాణ మయెన్ !!

నవ వధువౌ సీత వరుడు
రవికులతిలకుని ప్రతిమలు రమణీయమ్మై
నవమిన ధగధగ మెరియ
న్నువిదకు నుంగరమె మేటి యొడ్డాణ మయెన్ !!!
(శంకరాభరణం  బ్లాగులో  01-07-2013 నాటి  సమస్యా పూరణ-   1099 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు )

శివుడు దశరథునకు చిన్నకొడుకు!!!

శివుడు దశరథునకు చిన్నకొడుకు కాదు
గాన కోడలమ్మ కాదుగిరిజ
కరిముఖుండుజూడ కాబోడుమనుమండు
ఎవరికెవరుతండ్రి యెఱుగతరమె !!!

(శంకరాభరణం  బ్లాగులో  30-06-2013 నాటి  సమస్యా పూరణ-   1098 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు )

కుందేలునుకోడిపిల్ల గుటుకున మ్రింగెన్ !!!

అందరి వలెనే భయపడి
మందును మ్రింగకయె బాల మరిమరి యేడ్వన్
పందిరిలో కనిపించెను
కుందేలును,కోడిపిల్ల ;గుటుకున మ్రింగెన్ !!!
(శంకరాభరణం  బ్లాగులో  29-06-2013 నాటి  సమస్యా పూరణ-   1097 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు

కుండలోన బెట్టె గువలయమును !!!

నేత్ర యుగళమందు నెలరాజు దినరాజు
వక్షముపయి లక్ష్మి లక్షణముగ
నలరు శౌరి నుదరమను నట్టి కొండొక
కుండలోన బెట్టె గువలయమును
 
(శంకరాభరణం  బ్లాగులో  27-06-2013 నాటి  సమస్యా పూరణ-   1095లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)

కలఁ గాంచితి మోదమలరఁ గనుమూయకయే!!!

అలకేదారముజని వర
దలచిక్కినమమ్ముగాచు  దైవముగ జవా
నులపలు  వైమానిక చిలు
కలఁ గాంచితి మోదమలరఁ గనుమూయకయే!!!

(శంకరాభరణం  బ్లాగులో  26-06-2013 నాటి  సమస్యా పూరణ-   1094లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)

అవధానమ్మున జేయ కూడదు సమస్యా పూరణ మ్మెప్పుడున్ !!!

అవధానమ్మున జేయ కూడదు సమస్యా పూరణ మ్మెప్పుడు
న్నవమానంబులుజేయుచున్ విబుధులన్ సాహిత్య సన్మూర్తులన్ .
అవనిన్ పండిత శ్రేణి మెచ్చును గదాయత్యంత రమ్యంబుగా
నవదానమ్మునుజేయగా పదములందందాలుచిందించుచున్ !!!

(శంకరాభరణం  బ్లాగులో  25-06-2013 నాటి  సమస్యా పూరణ-   1093 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)

కమ్మలు మోకాళ్ళు దాఁకి ఘలు ఘలుమనియెన్!

బొమ్మకు ధగధగ మెరిసెడు
సొమ్ములు దట్టించి పెట్ట సోకుకు, ముద్దుం
గుమ్మలు ముట్టన్ పైబడి
కమ్మలు మోకాళ్ళు దాఁకి ఘలు ఘలుమనియెన్!

కుమ్మెను నిర్భయ పులిచం
దమ్మున కామాంధునికడు ధైర్యముతోడన్
గ్రమ్మిన మైకము తొలగన్
కమ్మలు మోకాళ్ళు దాఁకి ఘలు ఘలుమనియెన్!


(శంకరాభరణం  బ్లాగులో  24-06-2013 నాటి  సమస్యా పూరణ-   1092 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)

కుల వాసన నెంచిచూడ గుమగుమ లాడెన్!!!

 అలనాటి బాల్య మిత్రుడు
చెలికాడగుహరికినిడె కుచేలుడు భక్తిన్
పలుచని మూటను, చిరుయటు
కుల వాసన నెంచిచూడ గుమగుమ లాడెన్!!!

(శంకరాభరణం  బ్లాగులో  23-06-2013 నాటి  సమస్యా పూరణ-   1091 లోఇచ్చిన సమస్యకు చేసిన పూరణ
.తోటి మిత్రుల పూరణలు బ్లాగులో వీక్షించవచ్చు)

దారిద్ర్యమునందు సుఖము తప్పక దొరకున్ !!!

పోరుట నేరము గాదుగ
దారిద్ర్యమునందు ; సుఖము తప్పక దొరకున్
ధీరతగలవారికి చే
కూరును విజయములు పెక్కు, కువలయమందున్ !!!
(శంకరాభరణం  బ్లాగులో  22-06-2013 నాటి  సమస్యా పూరణ-   1090 లోఇచ్చిన సమస్యకు చేసిన పూరణ
.తోటి మిత్రుల పూరణలు బ్లాగులో వీక్షించవచ్చు)

లోభి!!!

ధనమునకు మూడు గతులని
వినయముగాజెప్ప లోభి వినడెవ్వారిన్
దిననీయడు తానుదినడు
మనుచుండును బంధుగణపు మాటలు బడుచున్ !!!

వందే శిఖిఫించమౌళి!!!

 


వందే వసుదేవ సుతా
వందే శిఖిఫించమౌళి వారిజ నేత్రా
వందే వారిరుహాసన
వందే జ్ఞానప్రదాత వందనమయ్యా !!!

ధర్మమున్న చోట దైవముండును గదా !!!

అంబ తోడునుండు సాంబుడండగనుండ
భయము తొలగుచుండు  జయము గలుగు
ధర్మమున్న చోట దైవముండును గదా
మందవారిమాట మణుల మూట !!!

సోమరెపుడు సాకు జూ పుచుండు !!!

సాధకుండు జూచు సానుకులతలను
సోమరెపుడు సాకు జూ పుచుండు
పనులు జేయుటందు పనులమానుటయందు
మందవారిమాట మణుల మూట !!!

నిండుకుండ తొణుకు చుండునా!!

విద్యయున్నవాడు వినయుడై భాసిల్లు
విషయ శూన్యుదెపుడు విఱ్ఱ వీగు
నిండుకుండ తొణుకు చుండునా యెపుడైన
మందవారిమాట మణుల మూట !!!

తెలుగు భాష !!!

అక్షరాలేబది యారుతో నలరారు
లక్షలారు పదాల లలిత భాష !
అచ్చులు హల్లులు అరుదైన అరసున్న
సున్నయును విసర్గలున్న భాష!
నెలవంక ముడులతో తలపైన గుడులతో
తలకట్టు కొమ్ముతో దనరుభాష !
ఏత్వాల ఓత్వాల ఔత్వాల ఋత్వాల
ఒత్తులైత్వాల గమ్మత్తు భాష!

పూర్ణచంద్రుని రూపమ్ము బోలుభాష!
భాను బింబంబు రీతి గన్పట్టుభాష !
గుండ్రముగనుండు నిండు భూగోళభాష!
వింత అనుభూతి నిడెడు అజంత భాష!

క్షీరాబ్ధి చిలుకంగ క్షితిపైన తెలుగింట
ఒలికిన తేనెయో తెలుగుభాష !
హరునిశిరంబందు సురగంగ దూకంగ
దివినుండి జారెనో తెలుగుభాష !
వాగ్దేవి నుదుటన బాలార్క బింబమై
వెలుగొందు తిలకమో తెలుగుభాష !
చంద్రవంకలపైన ఇంద్రచాపము లీల
వెలుగు వర్ణమ్ములో తెలుగుభాష !

చేవగల్గిన విశ్వ ప్రాచీన భాష !
దేవరాయలు మెచ్చిన జీవ భాష!
విశ్వ భాషల ధీటుగా వెలుగు భాష!
దేశ భాషల మణిపూస తెలుగుభాష !!!

అరటి తొక్క పైన నడుగిడి నట్లేను!!!

అల్పుడైనవాని కధికారమొసగుట
అధిక వడ్డి పైన నప్పు గొనుట
అరటి తొక్క పైన నడుగిడి నట్లేను
మంద వారిమాట మణులమూట!!!

వ్రాయ దగిన పనుల చేయుటొప్పగునేడు!!!

చదువదగిన యట్టి సారంపు రచనలే
వ్రాయుటొప్పునేటి రచయితలకు
వ్రాయ దగిన పనులె చేయుటొప్పగునేడు
మంద వారి మాట మణుల మూట!!!

కలుగు శుభములు పెక్కులు!!!

సాకు వెదకి పనుల సాగదీయుటలోన
చూపు నేర్పు నోర్పు జూప పనుల
సుఖము హెచ్చుకలుగు శుభములు పెక్కులు
మంద వారిమాట మణుల మూట !!!

చిరకాలపు జనకోరిక!!!

చిరకాలపు జనకోరిక
నెరవేరిన శుభతరుణము నేడెందరికో
పరమానందము కలిగెను
మురిసెతెలంగాణసీమ ముదముప్పొంగన్!!!

యదుభూషణ!!!

మదిచెదరిన విజయుని గని
కదనస్థలి వేదసార కథనము నంతన్
మృదుభాషణమును జేసిన
యదుభూషణ వేనవేలహారతులివిగో  !!!

ఏకాగ్రత !!!

లోకోపకారమునకై
యేకాగ్రత తోడజేయు నేపనియైనన్
శ్రీకరమౌ తపమేయగు
చేకూర్చును తగుఫలములు శ్రేయస్కరమౌ  !!!

వదలగ వలె మత్సరంబు!!!

చదువగవలె శాస్త్రంబుల,
వదలగ వలె మత్సరంబు, పరహితమెపుడున్
మెదలగవలెమదికోపము
నదమగవలె ,ధర్మ పథమునరుగగ వలెరా !!!

తగినది గాదయ్య !వేదధర్మము మనకున్ !!!

జగడము జీవన ప్రగతికి
తగినది గాదయ్య !వేదధర్మము మనకున్
జగతినగలవారలకున్
తగినది!తగుదారిచూపు తడబడువేళన్ !!!   
(శంకరాభరణం  బ్లాగులో  05-04-2013 నాటి  సమస్యా పూరణ-   1014 లోఇచ్చిన సమస్యకు చేసిన పూరణ
.తోటి మిత్రుల పూరణలు బ్లాగులో వీక్షించవచ్చు)

జనన మరణ గతులు జగదీశు క్రీడయౌ

నిన్న జనన మైన నేడు జీవితమౌను
తరలివచ్చురేపు మరణ మౌను
జనన మరణ గతులు జగదీశు క్రీడయౌ
మందవారి మాట మణుల మూట  !!!

శివశంకరయనిన బాప చింతన లెసగున్!!!

"శివరాతిరి దినమంతయు
శివనామముభక్తిమీర చింతనజేతున్
అవినీతి మకిలి తుడువుము
శివశంకర"యనిన బాప చింతన లెసగున్!!!

 (శంకరాభరణం  బ్లాగులో11-03-2013 నాటి  సమస్యా పూరణ- 990 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)

సూనుని దీవనలు మనకు శుభకరము లగున్!!!

పూనికతోతనమనమున
జానకిరాములనిలిపిన చరితార్థుని నా
వానరయోధుని అంజన
సూనుని దీవనలు మనకు శుభకరము లగున్!!!

 (శంకరాభరణం  బ్లాగులో  21-03-2013 నాటి  సమస్యా పూరణ-   1001  లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)

మయసభ !!!

భూములుమాయమాయెగదభూరిగ సెజ్జులపేరుతో ,పరం
ధామునిసొమ్ములున్ కరిగెధర్మముతప్పెనుదారి నాయక
స్వాముల చేష్టతో ఖనిజసంపద గాలినగల్సెజూడగా
యేమనిజెప్పుదున్ మయసభేర్పడెరాష్ట్రమునందుసోదరా !

రావణ బ్రహ్మ!!!

                                                             రావణ బ్రహ్మ (ఏ కాంకిక )
(ఈ రచన 1969-1970 లో వ్రాయబడింది.  అప్పటి  నా సహ విద్యార్థి ,మిత్రుడు శ్రీ రామగౌడ్ గారు రావణ పాత్రను అభినయించి కాలేజి వార్షికోత్సవం లో ప్రశంసలను పొందాడు .వారి సహకారంతో ఈ ఏకాంకికను జ్ఞాపకం ఉన్నంత వరకు బ్లాగు లో ప్రకటిస్తున్నాను).

 (తన చెల్లెలు శూర్పనఖకు  రామలక్ష్మణులచే జరిగిన అవమానమునకు రావణుని ప్రతిస్పందన ఈ ఘట్టము)

చాలించుము చెల్లీ నీ పల్కులు చాలించుము, కర్ణ కఠోర దుర్గ్రాహ్య మైన నీ పల్కులు చాలించుము !రామా !ఏమీ కనక కింకి ణి  మంజుల మంజీర శింజనంబులచే జగజ్జన కర్ణ రంజనము చేయు మస్సహోదరి కుసుమ శరుని శ రా పరంపరా పరవశయై వలచి నిన్ మోహింపగా  నీవీ తెఱoగున మత్ చిన్నారి ముద్దు చెల్లల ముక్కు చెవులు కోయింతువా!దురభిమానా ! దురితమున కొడగట్టుదువా ! నిన్ను మస్సునిశిత గదా దండ ప్రహారములచే దండపాణి సదనమున కంపక పోదునా! అశేష శేముషీ దురంధరుడు  అవక్ర పరాక్ర మోపేతు డగునీ  రావణ సార్వ భౌమునితో దలపడు నిచ్చ గల్గెనా ! వరించి వచ్చిన అమాయకపు వనిత నవలోకించి వార కాంత యని దలచితివా లేక నిష్కళంక లంకా  ద్వీప నియమబద్ద  యగు  నద్దాన వాంగనను  దరిజేర హేయమని దలచివా మనోజ పుష్ప శరవిరుద్దా నీకు జనక మహీశు   పుత్రికా రత్నమే ప్రాణ ప్రాయమా! మస్సహోదరి తనువు తృణ ప్రాయమా ! అరాతి వాహినీ సందోహము నవలీలగ నోలలాడించు ఈ అనంగ రంగ సామ్రాట్టు సహోదరియని యెరుగవా!
లేక దివసాగ మదళ అరవింద దళాక్షుడగు యా ఫాలాక్షుని అనన్య భక్తి తాత్పర్య నిష్టా గరిష్టుడగు ఈ రావణ సార్వ భౌమునితో పంతమా!
 ఔరా లక్ష్మ ణా కుసుమ కోమలి కురంగ లోచని దేహ భాగంబు ఖండింపగా నీకు చేతులెట్లు వచ్చినవి  ? పశువను కొంటివా  లేక ఈ విశాల విశ్వములో నీకిది యశమను కొంటివా !
రామా నా పంతము వినుము  అయోధ్యాపుర సామ్రాజ్య పట్ట మహిషి నీ అర్ధాంగి సీతను ఆకాశాంత రంగమందుండనీలేక  మౌక్తిక ఘటిత చంద్రకాంతా స్పటిక నిర్మితంబైన  సౌధoబునందుండనీ గాక  అంభోధినీ గర్భమందుండనీమత్ మాయావిద్యదక్షతచే యక్ష గరుడ గంధర్వ కిన్నర కింపురుష సిద్ది సాధ్య విద్యా ధరాది సమస్త దేవ గణం బులె దురొడ్డ నీ నీఅలికుల వేణి కనుగొలుకుల నుండి సలిలముల్ పొరలి జల జల నేల రాలనీ తద్లలనారత్నమున్దెచ్చిమద్లంకా పురి యన్దుంచెద అప్పుడు ఆప్త జన సంయుతుండవై వత్తువా సమస్త దేవగణాoభోది చే  రణో ర్విన్ జొత్తువా లేక అర్చుల్ పర్చు మద్నిశిత శర నికాయంబులకు నోర్తువా చూచెదను గాక !!!
                                                                                                                       

వేంకటేశ్వరా !!!

కోపము, తాపమున్, తగని కోరిక ,బొంకును, దూకుడున్, పటా
టోపము ,మోసమున్, సుజన దూషణ, యీ ర్ష్య లసూయలాదిగా
లోపములన్ని నామనుసు  లోనికి జేరగనీయ బోక మా
యాపద లార్పవే  నభయ హస్తము నీయవె వేంకటేశ్వరా !!!

మారుతిని గొల్చు వారల మతులు చెడును !!!

భీతినార్పును రాముండు ప్రీతి తోడ
మారుతిని గొల్చు వారల ,మతులు చెడును
ధర్మ మార్గమ్ము దప్పునధర్మ పరుల
తలలు పదియున్న ఫలము నిష్ఫలము సుమ్ము !!!

 (శంకరాభరణం  బ్లాగులో  14-04-2013 నాటి  సమస్యా పూరణ-   1023  లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)

ధ్వనిచేతన్ రసభంగమౌను పరమార్థంబెల్ల వ్యర్థంబగున్!!!

నిను సేవించదలంచి నామనసులో నీరూపు చిత్రించితిన్
మనసేచంచలమై నటున్నిటులుగామారాముజేసెన్ గదా
యినవంశోత్తమయెందుబోగలనునిన్నేరీతి ధ్యానింతు, సెల్
ధ్వనిచేతన్ రసభంగమౌను పరమార్థంబెల్ల వ్యర్థంబగున్!!!

 (శంకరాభరణం  బ్లాగులో  06-04-2013 నాటి  సమస్యా పూరణ-   1015  లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)

కన్నను శూరుండు ముజ్జగంబుల గలడే !!!

కన్నని దైవము కన్నను
కన్నులు మూడున్నవానికన్నను విషమున్

గొన్నను వెఱువని శశిధరు 

కన్నను శూరుండు ముజ్జగంబుల గలడే !!!

 (శంకరాభరణం  బ్లాగులో 09-04-2013 నాటి  సమస్యా పూరణ-1018 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)

కరిచెరవిడిపించుమని మకరి వేడెహరిన్!!!

తరిగెనుజలములుకొలనున,
చురచురమనె  మండుటెండ,చోద్యంబాయెన్
నరులకు, త్వరపడదటతొల
కరి,చెరవిడిపించుమని మకరి వేడెహరిన్!!!
 (శంకరాభరణం  బ్లాగులో 13-04-2013 నాటి  సమస్యా పూరణ-1022 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)
 

మరునిం బూజించమేలు మాతామహికిన్!!!

సురలకు నరులకు విద్యా
ధరులకుభూసురులకెల్ల దైవంబగు శ్రీ
కరునిన్ ఘనునిన్ శివునికు
మరునిం బూజించమేలు మాతామహికిన్!!!

 (శంకరాభరణం  బ్లాగులో 15-04-2013 నాటి  సమస్యా పూరణ-1024 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)
 

సంసారముదుర్భరమ్ము సత్పురషులకున్!!!

కంసాదుల తలదన్నుచు
హింసా మార్గమున నడుచు హీనుల వలనన్
ధ్వంసంబగుధర్మమిలను
సంసారముదుర్భరమ్ము సత్పురషులకున్!!! 

 (శంకరాభరణం  బ్లాగులో 16-04-2013 నాటి  సమస్యా పూరణ-1025 లోఇచ్చిన సమస్యకు చేసిన పూరణ.తోటి మిత్రుల పూరణలు బ్లాగులో వీక్షించవచ్చు)

శ్రీ రామ నవమి శుభాకాంక్షలు !!!

మిత్రులకు శ్రీ రామ నవమి శుభాకాంక్షలు !!!

ఆముని పనుపున  రఘుకుల
సోముడు హరువిల్లు ద్రుంచ సుమములు గురిసెన్
ఆమని మురియగ జరిగెను
రాముని తో సీత పెండ్లి రమణీయముగా  !!!

గజదొంగల హస్తమయ్యె!!!

నిజమున్ దెలియని వైనము 
ప్రజలను వంచించు మంత్రి వర్యులు మరియున్
రుజగ్రస్తమైనపాలన
గజదొంగల హస్తమయ్యె గదభారతమే !!!

తిరుమల దేవా !!!

తప్పని విద్యుత్కోతలు,
నిప్పులు గురిపించుయెండ, నీటికి చూడన్
యెప్పటి వలెనే కటకట
తిప్పలు దప్పించలేవ ?తిరుమల దేవా !!!

వెలుగులొలికించు ఘనమైన విజయ మిచ్చి!!!

కవిపండితులకు పాఠకులకు విజయనామ సంవత్సర శుభాకాంక్షలు.

వృద్ధి గలుగని సర్వ సమృద్ధి గాను
జనము  కీయేడు ఘనమైన జయముగలిగి!
మంచికాలమ్ముకాదను మాట ,నిజము
గాదు !సంతోష దాయకమీ దినమ్ము!

జనవాణి వినలేని ఘనమైన ప్రభువాణి
మననౌనె మననేల మహిన జూడ
ఘనరీతి యవినీతి జనరీతి కడుభీతి
విధివ్రాత తలవాత విధము లవియె
కనలేము కొనలేము తినలేము మనలేము
ధర లేమొ పైపైకి తరలి పోయె
వత్సరములు మారె !మత్సరమ్ము లవియె
జనుల జీవితములు జటిలమాయె
ప్రజల పీడించు విధములు ప్రబలి పోయె
మార్పు  రాదాయె పాలక మాన్యులందు
కలలు గనుటలో కాలమ్ము కరిగి పోయె
వెలుగులొలికించు ఘనమైన విజయ మిచ్చి!!!

సేవయందు రక్తి జీవకారుణ్యంబు!!!

సేవయందు రక్తి జీవకారుణ్యంబు
ధర్మ నిరతి గలుగు దార్శ నికుని
నమ్మకున్న తనను , నారాయణుడు మెచ్చు !
మందవారిమాట మణుల మూట !!!

కోరికుండుటొప్పు పేరాశయేముప్పు !!!

అనుభవించ గలడె యానంద మేనాడు
తృప్తి లేని నరుడు తృష్ణ వలన
కోరికుండుటొప్పు  పేరాశయేముప్పు
మందవారి మాట మణుల మూట !!!

నమ్మబోరు ప్రజలు నవ్వుచుంద్రు!!

పొగడు కొనగ నిన్ను పొగరుబోతనియేరు
నమ్మబోరు ప్రజలు నవ్వుచుంద్రు
నిజమనిదలిచేరు నిందించుకొన నిన్ను
మందవారి మాట మణుల మూట !!!

గుప్త నిధులయొక్క గుట్టు విప్పినయట్లు!!

ఎదుటి వారితప్పు లెన్నుటే  కడుప్రీతి,
గణన చేయుచుంద్రు గంతులేసి
గుప్త నిధులయొక్క గుట్టు విప్పినయట్లు!!
మందవారి మాట మణుల మూట !!!

తగిన దేది ?విడువదగిన దేది ?

మనిషి మనిషి యందు మంచియు చెడునుండు
తగిన దేది ?విడువదగిన దేది ?
తెలుసుకొనిన వాడె తెలివైన మనుజుండు
మంద వారి మాట మణుల మూట !!!

పొగడగతగు!!!

పొగడగతగుశాస్త్రజ్ఞుల
పొగడగతగు శౌర్యధనుల,పొగడగ తగునా
తెగబడి దేశపు సంపద
దిగమింగెడు మగసగముల,తెగడగ వలదా !!!

నిర్ణయములుతగవు నిండునిరాశలో !!!

వలదు  వరము లీయ  చెలగిసంతోషాన
కూయ బోకు మెపుడు కోపమందు
నిర్ణయములుతగవు నిండునిరాశలో
మంద వారి మాట మణుల మూట !!!

రాత్రి వెళ్ళి పోవు రవిమళ్ళి ప్రభవించు !!!

చెట్టు కొమ్మ విరుగ  చిగురించు తరుశాఖ
కలత జెందనేల కష్టములకు
రాత్రి వెళ్ళి పోవు రవిమళ్ళి  ప్రభవించు
మంద వారిమాట మణుల మూట !!!

అబ్బుచుండు మంచి యలవాట్లు వారికే!!!

సమయమెల్ల నెపుడు సద్వినియోగమ్ము

చేయువారిచెంత జేరు జయము

అబ్బుచుండు మంచి యలవాట్లు వారికే

మంద వారి మాట మణుల మూట !!!

విజయ పథమునకదె నిజమైన తొలిమెట్టు !!!

సాధ్య  పడదనుచిరు సంశయంబునువీడు
భయము తొలిగి నాత్మ బలము పెరుగు
విజయ పథమునకదె నిజమైన తొలిమెట్టు
మందవారి మాట మణుల మూట !!!

రాజులైన ప్రజకు రాళ్ళ సమానమే !!!

అర్థ శాస్త్రమెల్ల  ఆపోశనంబట్టి
కూడు బెట్ట లేని కుటిల మతులు
రాజులైన ప్రజకు రాళ్ళ సమానమే
మంద వారి మాట మణుల మూట !!!

మనసు జ్ఞానమందు మునుగంగ శుభ్రమౌ !!!

మనిషి శుభ్రమౌను మలినముల్ తొలుగును
నీటి లోన మునుగ నిక్కముగను
మనసు జ్ఞానమందు మునుగంగ శుభ్రమౌ !!
మంద వారిమాట మణుల  మూట!!!

కదల లేని వారి కథమారిపోవులే !!!

కాల మాగ బోదు,కాలానుగుణముగా 
కదులు వారికెపుడు గలుగు శుభము
కదల లేని వారి కథమారిపోవులే
మంద వారి మాట మణుల మూట !!!

జ్ఞాను లెదుట తిరుగ జ్ఞానౌనె మూర్ఖుడు !!

పానకమున మునిగి  పలుమార్లు తేలినా
యెఱుగబోదు తీపినెపుడు "గరిట"
జ్ఞాను లెదుట తిరుగ జ్ఞానౌనె మూర్ఖుడు
మంద వారిమాట మణుల మూట !!!

బుద్దులు నేర్పని గురుండు

హద్దులు జెప్పని జనకుడు
యుద్డంబునుజేయలేని యోధుడు భార్యన్
ముద్దుగ జూడని మగడును
బుద్దులు నేర్పని  గురుండు  పూజ్యులె  దలపన్ !!!

మనసా నీవాసమేడ?

కననైతినినీరూపును
విన నైతిని నీదు వాణి వివరిoపంగన్ 
తనువెల్ల తరచి చూచితి
మనసా నీవాసమేడ? మనుజుల లోనన్!!!   

ఓటరు దేవా !!!

తప్పుడు నడతల వారల
కొప్పునె పట్టంబు గట్ట ఓటరు దేవా
నిప్పును తలపై బెట్టిన
చప్పున నిలువెల్ల గాల్చి  చంపును గాదే !!!

గోవింద కాపాడవే !!!

 

హరివై   శంభుడవై   చతుర్ముఖుడవై  అoభొధివై    అగ్నివై 

సిరివై    పార్వతివై   విధాతసతివై       జీవంబువై వాయువై 

ధరవై    సుర్యుడవై  సుధాకరుడవై    దైవంబువై     నింగివై 

గురువై  పూర్ణుడవై  పరాత్పరుడవై    గోవింద కాపాడవే !!!